Gruziya sobiq prezidenti Mixail Saakashvilining oilasi mamlakat hukumatiga uning, gruzin prokuraturasi fikricha, davlat pullariga sotib olingan kiyimlarini pochta orqali yubordi. Bu haqda Gruziya telekanallariga tayanib “RIA Novosti” xabar berdi.
Xabar qilinishicha, seshanba kuni tongda kuryer hukumat ma’muriyati binosiga pochta jo‘natmasini keltirgan. Unda “Janob Ivanishvili, buni o‘z ixtiyoringizga ko‘ra ishlatish uchun qaytarmoqdaman”, — degan yozuv bo‘lgan. Qabul bo‘limida jo‘natmani olishmadi va buni ular faqat rasmiy xatlarni qabul qilish huquqiga ega ekanliklari bilan izohlashdi. Shunga qaramay, kuryer jo‘natmani hukumat kanselyariyasi qabulxonasida qoldirdi.
O‘tgan hafta Gruziya bosh prokuraturasi Mixail Saakashviliga davlat mablag‘lari kamomadi bo‘yicha ayblov e’lon qilgan edi. Bunda gap davlatga tegishli pullarning shaxsiy ehtiyojlar uchun sarflab yuborilgani haqida bormoqda. Davlat hisobidan to‘langan shaxsiy xizmatlar ro‘yxatida Londonda sotib olingan 28,6 ming dollarlik yettita pidjak va kashmiri palto, shuningdek 4,6 ming dollarlik qo‘lda tikilgan ikkita kostyum ham bo‘lgan. Gruziya televideniyesi xabariga ko‘ra, Saakashvili oilasi hukumat ma’muriyatiga kashmiri palto va yettita pidjakni yuborgan.
Avvalroq Saakashvilining o‘zi Gruziyada to‘qqiz yil prezidentlik qilib, mamlakatni butun dunyo bilan tanishtirgan, uni mashhur qilgan davlat rahbari davlat hisobidan yettita pidjak sotib olishga haqqi borligini ta’kidlagan edi. Saakashvili so‘zlariga ko‘ra, u o‘zining shaxsiy puliga qimmatbaho kiyim-kechak xarid qila olmasdi, chunki uning oilasida boshqa daromad manbai bo‘lmagan.
O‘z navbatida Gruziya prokuraturasi Saakashvilining boshqa katta xarajatlari ro‘yxatini ham e’lon qildi va dalil sifatida ba’zi cheklarning skanerlangan nusxalarini ilova qildi.
Ayblovlar tasdiqlangan holda, Saakashvili 7 yildan 11 yilgacha ozodlikdan mahrum etilishi mumkin.
Saakashvilining qayerdaligi hozircha noma’lum. U o‘tgan yilning noyabrida bo‘lib o‘tgan yangi prezident inauguratsiyasidan keyin shoshilinch tartibda Gruziyani tark etgan, shundan buyon unga qarshi uchta jinoyat ishi ochilgani sababli, Saakashvili vataniga qaytishdan hayiqmoqda.
Izoh (0)