Malayziyaning “Boing”i aviahalokati qurbonlarining ilk murdalari avariya joyi yaqinidagi Torez shahriga poyezdda keltirildi. Bu haqda Euronews xabar berdi.
Halok bo‘lganlarning shaxsini aniqlash bilan shug‘ullanadigan niderlandiyalik ekspertlar refrijerator vagonlardan iborat tarkib ukrain hukumati nazorati ostidagi hududga yetib kelishini kutmoqda. Ularning aytishicha, faqat shundan keyin shaxslarni aniqlash jarayonini boshlash mumkin bo‘ladi.
Ukraina bosh vaziri Arseniy Yatsenyuk hukumat xalqaro tergov ishlarini “niderlandiyalik do‘stlar”ga berishga tayyor ekanini, ular esa xalqaro jamoatchilik bilan tergov ishlarini birga olib borishini aytdi.
Yatsenyuk so‘zlariga ko‘ra, halokat joyida 272 kishining jasadlari topilgan, ularning ko‘pchiligi Torezga yuborilgan. Samolyot qulagan hududda xalqaro vakillar ishlamoqda. Niderlandiyadan kelgan komissiya dushanba kuni ertalab layner bo‘laklarini ko‘zdan kechirgan.
Eslatib o‘tamiz, “Donetsk xalq respublikasi” rahbari Aleksandr Boroday MH-17 reysining ikkita qora qutilari Donetskda ekanini aytgan edi.
Ayirmachilar ularni Fuqarolik aviatsiyasi xalqaro tashkiloti rasmiy vakillariga bermoqchi.
Izoh (0)