Малайзиянинг «Боинг»и авиаҳалокати қурбонларининг илк мурдалари авария жойи яқинидаги Торез шаҳрига поездда келтирилди. Бу ҳақда Euronews хабар берди.
Ҳалок бўлганларнинг шахсини аниқлаш билан шуғулланадиган нидерландиялик экспертлар рефрижератор вагонлардан иборат таркиб украин ҳукумати назорати остидаги ҳудудга етиб келишини кутмоқда. Уларнинг айтишича, фақат шундан кейин шахсларни аниқлаш жараёнини бошлаш мумкин бўлади.
Украина бош вазири Арсений Яценюк ҳукумат халқаро тергов ишларини «нидерландиялик дўстлар»га беришга тайёр эканини, улар эса халқаро жамоатчилик билан тергов ишларини бирга олиб боришини айтди.
Яценюк сўзларига кўра, ҳалокат жойида 272 кишининг жасадлари топилган, уларнинг кўпчилиги Торезга юборилган. самолёт қулаган ҳудудда халқаро вакиллар ишламоқда. Нидерландиядан келган комиссия душанба куни эрталаб лайнер бўлакларини кўздан кечирган.
Эслатиб ўтамиз, «Донецк халқ республикаси» раҳбари Александр Бородай МH-17 рейсининг иккита қора қутилари Донецкда эканини айтган эди.
Айирмачилар уларни Фуқаролик авиацияси халқаро ташкилоти расмий вакилларига бермоқчи.
Изоҳ (0)