Osiyo taraqqiyot banki Taxiatosh elektr stansiyasi modernizatsiyasi uchun 300 mln dollar kredit ajratdi

O‘zbekistonning Taxiatosh issiqlik elektr stansiyasini modernizatsiya qilish ishlari boshlandi. Bu haqda UzDaily xabar berdi.

Loyiha eski energiya bloklarini foydalanishdan to‘xtatish hisobiga ikkita yangi 280 MVt quvvatga ega bug‘-gaz qurilmasini o‘rnatishni ko‘zda tutadi.

Osiyo taraqqiyot banki (OTB) ma’lumotlariga ko‘ra, loyihaning qiymati 700 million dollarni tashkil etadi.

Olti yilda tugallanishi lozim bo‘lgan bu loyihaga OTB 300 million dollar miqdorida kredit kiritadi, qolgan qismi O‘zbekiston Respublikasining tiklanish va taraqqiyot jamg‘armasi (270 million dollar), “O‘zbekenergo” DAK va O‘zbekiston hukumati (130 million dollar) tomonidan qoplanadi.

Loyiha 2020-yil oktabr oyida yakunlanishi kutilmoqda.

Ma’lumot uchun, Taxiatosh IES’ning quvvati 730 MVtni tashkil etib, u Qoraqalpog‘iston Respublikasi va Xorazm viloyatini elektr energiyasi bilan ta’minlaydi.