“Angren Shakar” mas’uliyati cheklangan jamiyat xususiy korxonasining ta’sischilari bo‘lmish singapurilik va avstriyalik investorlar 108,45 million dollarlik ushbu shakar zavodini sentabr oyida ishga tushirmoqchi. Bu haqda Trend.az xabar berdi.
Zavod qurilishini bitkazish dastlab 2014-yil dekabriga mo‘ljallangan edi. Endi qurilish ishlarini tezlashtirish bo‘yicha chora-tedbirlar amalga oshirilmoqda. “Qurilish muddatining tezlashtirilishi O‘zbekistonda aholini va oziq-ovqat sanoatini shakar bilan ta’minlashda yuzaga kelgan muammolarni hal qilishga qaratilgan”, — deyiladi xabarda.
O‘zbekiston Oziq-ovqat sanoati assotsiatsiyasi ma’lumotiga ko‘ra, sohadagi konditerlik korxonalarining shakarga bo‘lgan ehtiyoji taxminan 40 foizga qondirilmoqda.
O‘zbekiston Respublikasining Xususiylashtirish, monopoliyadan chiqarish va raqobatni rivojlantirish davlat qo‘mitasi shakar mahsuloti “sun’iy taqchilligi”ning kelib chiqishiga asosiy sabab oddiy olibsotarlik, shu jumladan ushbu mahsulot bozorida faoliyat ko‘rsatayotgan ulgurji vositachilar hamda chakana savdo do‘konlari o‘rtasida o‘zaro til biriktirish, kelishib harakat qilish holatlari ham ehtimoldan xoli emasligidir, deya izoh bergan edi.
“Angren Shakar” MChJ XK “Angren” maxsus industrial zonasida 2012-yilning may oyida Singapurning Welton International, Kito Investment va Avstriyaning SEID Handelsgesellschaft m.b.H tomonidan tuzilgan edi.
Ushbu kompaniyalar respublikamizdagi shakar ishlab chiqarish bo‘yicha monopol korxona — “Xorazm Shakar” OAJ XKning aksionerlari ham hisoblanadi. Ayni paytda uning quvvati sutkasiga ming tonna shakarni tashkil qilmoqda.
Rasmiy ma’lumotlarga ko‘ra, O‘zbekistonning shakarga bo‘lgan yillik ehtiyoji 700 ming tonnani tashkil etadi, shundan 350 ming tonnasi jahon bozoridan sotib olinadi.
Izoh (0)