Toshkentdagi Korzinka.uz do‘konlari o‘rtasida JCh — 2014’ga bag‘ishlab e’lon qilingan tanlovda TTZdagi do‘kon g’olib bo‘ldi. Bu haqda Korzinka.uz rahbari Zafar Hoshimov Facebook’dagi “Potrebitel.uz” guruhida post qoldirdi.
“TTZdagi Korzinka.uz do‘koni o‘zining Braziliyadagi jahon chempionatiga bag‘ishlangan installyatsiyasi bilan 105 ta ovoz to‘plab, g‘olib bo‘ldi, — deb yozadi Zafar Hoshimov. — Va’da qilinganidek, ushbu do‘kon xodimlari yakshanbadan dushanbaga o‘tar kechasi (14-iyul) Toshkent vaqti bilan 00:00 da boshlanadigan jahon chempionati finalini tomosha qilish uchun Toshkentdagi sport kafelaridan biriga taklif etiladi”.
Sovg‘a ustiga sovg‘a sifatida do‘kon xodimlariga final o‘yinining ertasiga — 14-iyul, dushanba kuni ishga odatdagidek 8:00 da emas, 13:00 da kelishga ruxsat berdi. Muallif xaridorlardan yuzaga kelishi mumkin bo‘lga noqulayliklar uchun uzr so‘radi.
Korzinka.uz do‘konlar tarmog‘i direktori yana bir bora o‘z saxiyligi uchun foydalanuvchilar olqishlariga sazovor bo‘ldi.
Eslatib o‘tamiz, Korzinka.uz rahbari Zafar Hoshimov tarmoq do‘konlari ichida eng yaxshi futbol installyatsiyasi bo‘yicha tanlov e’lon qilgan edi. U Facebook’dagi “Potrebitel.uz” guruhi foydalanuvchilarini ovoz berishda ishtirok etishga chaqirgan.
Turli Korzinka.uz do‘konlarida suratga olingan installyatsiyalar guruhga joylab borildi, eng ko‘p “layk” yig‘gani g‘olib deb topildi. Tarmoq direktori Jahon chempionati finalini Toshkentdagi sport kafelaridan birida kechki ovqat va ichimliklar bilan tomosha qilish imkoniyatini mukofot sifatida va’da bergan edi. Tanlov 2014-yil 10-iyul 23:59 da tugadi.
Izoh (0)