Тошкентдаги Korzinka.uz дўконлари ўртасида ЖЧ — 2014’га бағишлаб эълон қилинган танловда ТТЗдаги дўкон ғолиб бўлди. Бу ҳақда Korzinka.uz раҳбари Зафар Ҳошимов Facebook’даги «Potrebitel.uz» гуруҳида пост қолдирди.
«ТТЗдаги Korzinka.uz дўкони ўзининг Бразилиядаги жаҳон чемпионатига бағишланган инсталляцияси билан 105 та овоз тўплаб, ғолиб бўлди, — деб ёзади Зафар Ҳошимов. — Ваъда қилинганидек, ушбу дўкон ходимлари якшанбадан душанбага ўтар кечаси (14 июль) Тошкент вақти билан 00:00 да бошланадиган жаҳон чемпионати финалини томоша қилиш учун Тошкентдаги спорт кафеларидан бирига таклиф этилади».
Совға устига совға сифатида дўкон ходимларига финал ўйинининг эртасига — 14 июль, душанба куни ишга одатдагидек 8:00 да эмас, 13:00 да келишга рухсат берди. Муаллиф харидорлардан юзага келиши мумкин бўлга ноқулайликлар учун узр сўради.
Korzinka.uz дўконлар тармоғи директори яна бир бора ўз сахийлиги учун фойдаланувчилар олқишларига сазовор бўлди.
Эслатиб ўтамиз, Korzinka.uz раҳбари Зафар Ҳошимов тармоқ дўконлари ичида энг яхши футбол инсталляцияси бўйича танлов эълон қилган эди. У Facebook’даги «Potrebitel.uz» гуруҳи фойдаланувчиларини овоз беришда иштирок этишга чақирган.
Турли Korzinka.uz дўконларида суратга олинган инсталляциялар гуруҳга жойлаб борилди, энг кўп «лайк» йиққани ғолиб деб топилди. Тармоқ директори Жаҳон чемпионати финалини Тошкентдаги спорт кафеларидан бирида кечки овқат ва ичимликлар билан томоша қилиш имкониятини мукofот сифатида ваъда берган эди. Танлов 2014 йил 10 июль 23:59 да тугади.
Изоҳ (0)