Vazirlar Mahkamasi qarori bilan Oliy ta’lim muassasalariga qabul qilish, talabalar o‘qishini ko‘chirish, qayta tiklash va o‘qishdan chetlashtirish tartibi to‘g‘risidagi nizomga o‘zgartirish va qo‘shimchalar kiritildi.
Oliy ta’lim muassasalarining bakalavriatiga talabalarni qabul qilish tartibi to‘g‘risidagi nizomga kiritilgan o‘zgartirishlar natijasida o‘zbek guruhlariga hujjat topshirgan abituriyent o‘z arizasiga asosan test sinovlarini o‘zbek tilida lotin yoki kirill alifbosida topshirish huquqiga ega bo‘ldi.
Kirish imtihonlaridagi “Matematika” bloki nomi “Matematika (informatika bilan)” so‘zlari bilan almashtirildi. “Matematika (informatika bilan)” fanidan test savollari “Matematika” fani bo‘yicha birinchi 30 ta savol, “Informatika va axborot texnologiyalari” fani bo‘yicha oxirgi 6 ta savoldan iborat bo‘ladi.
Oliy ta’lim muassasalarining magistraturasiga qabul qilish tartibi to‘g‘risidagi nizomga esa magistraturaga kiruvchilarning ilmiy va ilmiy-pedagogik ishlarga qobiliyati hamda qiziqishini aniqlash maqsadida tanlangan mutaxassislikka mos savollar asosida suhbatdan o‘tkazish to‘g‘risida qo‘shimcha kiritildi (baholash mezoni 0 balldan 50 ballgachani tashkil etadi).
Suhbatdan o‘tkazish uchun tanlangan mutaxassislikka mos abituriyentning ilmiy va ilmiy-pedagogik ishlarga qobiliyati hamda qiziqishini aniqlashga qaratilgan savollar yetakchi mutaxassislar tomonidan tuziladi va bir oy oldin abituriyentlar e’tibori uchun qabul komissiyasi axborot doskasida e’lon qilinadi. Mazkur savollar asosida imtihon biletlari tuziladi va suhbat vaqtida abituriyent imtihon biletiga javoblarini komissiyaga yozma ravishda taqdim etib, savollarga og‘zaki javob beradi. Suhbat davomida abituriyentning ilmiy maqola yoki tezislari (yoki ularga tenglashtirilgan hujjatlari) ko‘rib chiqilib, suhbat natijalarini baholashda inobatga olinadi
Izoh (0)