8-iyul kuni Toshkent vaqti bilan 20:58 da Qozog‘istondagi Boyqo‘ng‘ir kosmodromida “Soyuz- 2.1b” eltuvchi raketasi muvaffaqiyatli uchirildi. U orbitaga yettita sun’iy yo‘ldoshni olib chiqdi. Bu haqda “Roskosmos” sayti xabar berdi.
Ko‘p o‘tmay ijtimoiy tarmoqlargda Toshkent osmonida g‘alati “narsa” paydo bo‘lgani haqida postlar joylandi. Ilova qilingan suratlarda osmonni kesib o‘tgan tutunli yorqin izni ko‘rish mumkin. “Osmonimizda allambalo ko‘rindi!!! Bu nima ekan, kimdir ko‘rdimi?” — deyiladi xabarda.
Bunday hodisa birinchi marta sodir bo‘lmayotgani uchun, bu borada “tajribali” foydalanuvchilar uning raketaga tegishli iz ekanini darhol ma’lum qilishgan va javob ishonarli bo‘lishi uchun Boyqo‘ng‘irda raketa uchirilgani haqidagi xabarni qo‘shimcha qilishgan.
Biroq hazilkash foydalanuvchilar rasmda uchar likopcha muhrlanganini aytishgan, ba’zilar esa hodisani Kelesdagi “maxluq” bilan bog‘lashgan. Yana kimdir voqeaga ilmiy yondashib, yorqin tutun kumushrang bulutga tegishli ekanini ta’kidlagan.
Izoh (0)