1-iyul kuni O‘zbekiston Vazirlar Mahkamasi “O‘rta maxsus, kasb-hunar ta’limi o‘quv muassasalari o‘quvchilari o‘rtasida “Barkamol avlod — 2014” sport musobaqalari o‘tkazilishi yakunlari to‘g‘risida” qaror qabul qildi. Unda shu yil 29—31-mayda Namangan shahrida o‘tkazilgan “Barkamol avlod — 2014” sport musobaqalari yakunlari bilan bog‘liq ma’lumotlar berilishi bilan birga, yoshlarni sport bilan shug‘ullanishga jalb etish ishlari zarur darajada tashkil etilmagani uchun ba’zi viloyatlar tanqid qilindi.
Bolalarning sport mashg‘ulotlari bilan qamrab olinishini oshirish uchun zarur shart-sharoitlar yaratish, sport inshootlarining moddiy-texnika bazasini mustahkamlash bo‘yicha tizimli ishlar tashkil etilganligi, shuningdek “Barkamol avlod — 2014” sport o‘yinlarining yakunlovchi bosqichida tegishli jamoalarning ishtiroki natijalari bo‘yicha erishilgan yuqori sport ko‘rsatkichlari uchun Toshkent shahri hokimi R.J. Usmonovga, Namangan viloyati hokimi B.T. Yusupovga va Samarqand viloyati hokimi Z.T. Mirzayevga, shuningdek, “Barkamol avlod — 2014” musobaqalarida yuqori natijalarga erishishga ulush qo‘shgan o‘rta maxsus, kasb-hunar ta’limining hududiy boshqarmalari va madaniyat va sport ishlari boshqarmalari rahbarlariga hamda o‘quvchilari va tarbiyalanuvchilari “Barkamol avlod — 2014” musobaqalarida eng yaxshi natijalar ko‘rsatgan akademik litseylar va kasb-hunar kollejlari rahbarlariga va mintaqaviy jamoalarning trenerlariga tashakkurnoma bildirish haqida qaror qilindi.
Sport obyektlaridan foydalanishning yetarlicha samaradorligi ta’minlanmaganligi, bolalar sportini rivojlantirish bo‘yicha amalga oshirilayotgan ishlarning darajasi pastligi va jamoalarning qoniqarsiz yakuniy natijalari uchun Qoraqalpog‘iston Respublikasi Vazirlar Kengashi Raisi B.Ya. Yangiboyevga, Sirdaryo viloyati hokimi O.Sh. Ashurmatovga va Jizzax viloyati hokimi S.U. Ismailovga hayfsan e’lon qilindi.
“Barkamol avlod — 2014” yoshlar o‘yinlarining boshlang‘ich bosqichlariga tayyorgarlik ko‘rish va o‘tkazishdagi nuqsonlar va kamchiliklar uchun O‘rta maxsus, kasb-hunar ta’limi markazi direktori U.Z. Salimov ogohlantirildi, O‘rta maxsus, kasb-hunar ta’limi markazi direktorining birinchi o‘rinbosari X.F. Zikrillayevga esa hayfsan e’lon qilindi.
Bundan tashqari, ishda yo‘l qo‘yilgan kamchiliklar uchun Sirdaryo (B. Ismatov) va Jizzax (M. Yusupov) viloyatlari madaniyat va sport ishlari boshqarmalari boshliqlari, Qoraqalpog‘iston Respublikasi Madaniyat va sport ishlari vazirining o‘rinbosari (D. Kalxurozov), shuningdek Qoraqalpog‘iston Respublikasi o‘rta maxsus, kasb-hunar ta’limi boshqarmasi boshlig‘i (D. Izzatullayev) egallab turgan lavozimidan ozod qilindi.
Sirdaryo (N. Egamberdiyev) va Jizzax (Sh. Turdiyev) viloyatlari o‘rta maxsus, kasb-hunar ta’limi boshqarmalari boshliqlariga hayfsan e’lon qilindi.
Izoh (0)