O‘zbekiston Milliy axborot agentligi rasmiy sayti – uza.uz dizayni o‘zgardi. Sayt 7-iyul, dushanba kunidan boshlab yangi dizaynda faoliyat ko‘rsatishni boshladi, deya xabar berdi “Kun”. Redizayn ishlari qaysi kompaniya tomonidan amalga oshirilgani to‘g‘risida ma’lumot yo‘q.
Yangi dizaynda O‘zA sayti zamonaviylashgan, saytning avvalgi versiyasida bo‘lmagan interaktiv xizmatlar (internet-qabulxona, fuqarolar murojaati, rezyume qoldirish va hokazo) joriy etilgan.
Foydalanuvchilarga qulaylik yaratish uchun agentlik axborotlarining kunlar bo‘yicha arxivlari, shuningdek, doimiy ruknlardan tashqari O‘zA davlat siyosatidan kelib chiqib yoritilgan mavzular (masalan, “Yoshlarga oid davlat siyosati”, “Mustaqilligimizning 23 yilligi” va hokazo) bo‘yicha arxivlar qo‘shilgan.
Bundan tashqari, saytning yangilangan versiyasida mavjud fotogalereyalarga yangi, o‘lchamlari nisbatan kattaroq bo‘lgan suratlar qo‘yilgan. Saytning qidiruv tizimi esa avvalgi versiyadan farqli o‘laroq nisbatan mukammallashtirilgan.
Sayt yangi dizaynda endi ish boshlagani sabab, unda ba’zi kamchiliklar ham yo‘q emas. Xususan, saytning yuqori qismida joylashgan Facebook ijtimoiy tarmog‘i, Twitter mikrobloglar xizmati va RSS-lenta tugmalari hozircha ishlamayapti. Bundan tashqari, ba’zi yangi tashkil etilgan sahifalarda (masalan, “Vakansiya”) ma’lumot yo‘q.
Yana bir noqulaylik sifatida sayt faoliyat olib boradigan tillar ro‘yxati sahifa qaysi tilda bo‘lsa, o‘sha tilda berilganidir. Masalan, saytning xitoycha versiyasiga kirgan foydalanuvchi o‘zbekcha versiyaga o‘tish tugmasini topolmay qiynalishi mumkin.
Ma’lumot uchun, O‘zbekiston Milliy axborot agentligi 1992-yil 5-fevralda O‘zbekiston Prezidenti Islom Karimovning Farmoniga asosan tashkli etilgan bo‘lib, davlat rasmiy axborot manbai va mamlakatdagi yetakchi axborot agentligidir.
O‘zA o‘z axborotlarini o‘zbek, rus, ingliz, fransuz, nemis, ispan, arab va xitoy tillarida tarqatadi.
Izoh (0)