Kecha, 8-iyul kuni Toshkentdagi “Everiya” qahvaxonasi yaqinida yo‘lning ikki tomonida to‘xtab turgan ikkita Spark qurigan daraxt shoxi ostida qoldi. Bu haqda Facebook’dagi “Voditeli Tashkenta” (“Toshkent haydovchilari”) guruhi a’zolari xabar berdi.
Xabarga ilova qilingan suratda ulkan daraxtning kattagina shoxi qurib qolganini ko‘rish mumkin. Uning uzunligi ko‘chaning ikki yuzidagi mashinalarni bosib qolish uchun yetarli bo‘ldi. Qizig‘i shundaki, har ikkala avtomobil ham Spark rusumida.
Postga bildirilgan fikrlarda foydalanuvchilar mashina egalariga hamdardlik izhor etgan va sug‘urta kompaniyalari yetkazilgan zararni qoplash-qoplamasligi ustida bahs olib borilgan. Guruh a’zolaridan ba’zilari bu sug‘urta kompaniyalarining majburiyati ekanini ta’kidlagan bo‘lsa, boshqalar zararni qoplash uchun kompaniya avval vaziyatni baholashini ta’kidlagan. “Sug‘urta kompaniyasi mutaxassislari zararni qoplamaslik qarorini chiqarishi mumkin, — dedi foydalanuvchilardan biri. — Chunki atrofda tayyor “parkovka” bo‘lsa-da, haydovchi qurigan daraxt tagidagi joyni tanlagan”.
Izoh (0)