ЎзА Миллий ахборот агентлиги ўз сайти дизайнини ўзгартирди

Ўзбекистон Миллий ахборот агентлиги расмий сайти – uza.uz дизайни ўзгарди. Сайт 7 июль, душанба кунидан бошлаб янги дизайнда фаолият кўрсатишни бошлади, дея хабар берди «Кун». Редизайн ишлари қайси компания томонидан амалга оширилгани тўғрисида маълумот йўқ.

Янги дизайнда ЎзА сайти замонавийлашган, сайтнинг аввалги версиясида бўлмаган интерактив хизматлар (интернет-қабулхона, фуқаролар мурожаати, резюме қолдириш ва ҳоказо) жорий этилган.

Фойдаланувчиларга қулайлик яратиш учун агентлик ахборотларининг кунлар бўйича архивлари, шунингдек, доимий рукнлардан ташқари ЎзА давлат сиёсатидан келиб чиқиб ёритилган мавзулар (масалан, «Ёшларга оид давлат сиёсати», «Мустақиллигимизнинг 23 йиллиги» ва ҳоказо) бўйича архивлар қўшилган.

Бундан ташқари, сайтнинг янгиланган версиясида мавжуд фотогалереяларга янги, ўлчамлари нисбатан каттароқ бўлган суратлар қўйилган. Сайтнинг қидирув тизими эса аввалги версиядан фарқли ўлароқ нисбатан мукаммаллаштирилган.

Сайт янги дизайнда энди иш бошлагани сабаб, унда баъзи камчиликлар ҳам йўқ эмас. Хусусан, сайтнинг юқори қисмида жойлашган Facebook ижтимоий тармоғи, Twitter микроблоглар хизмати ва RSS-лента тугмалари ҳозирча ишламаяпти. Бундан ташқари, баъзи янги ташкил этилган саҳифаларда (масалан, «Вакансия») маълумот йўқ.

Яна бир ноқулайлик сифатида сайт фаолият олиб борадиган тиллар рўйхати саҳифа қайси тилда бўлса, ўша тилда берилганидир. Масалан, сайтнинг хитойча версиясига кирган фойдаланувчи ўзбекча версияга ўтиш тугмасини тополмай қийналиши мумкин.

Маълумот учун, Ўзбекистон Миллий ахборот агентлиги 1992 йил 5 февралда Ўзбекистон Президенти Ислом Каримовнинг Фармонига асосан ташкли этилган бўлиб, давлат расмий ахборот манбаи ва мамлакатдаги етакчи ахборот агентлигидир.

ЎзА ўз ахборотларини ўзбек, рус, инглиз, француз, немис, испан, араб ва хитой тилларида тарқатади.