3-iyul kuni O‘zbekistondagi AQSh elchixonasida Amerika mustaqillik kuniga bag‘ishlangan tadbir bo‘lib o‘tdi. Bu haqda elchixonaning ijtimoiy tarmoqlardagi sahifalariga tayanib “Anhor” nashri xabar berdi.
Tadbirda mingga yaqin odam, shu jumladan, bosh vazir birinchi o‘rinbosari Rustam Azimov, tashqi iqtisodiy aloqalar, investitsiyalar va savdo vaziri Elyor G‘aniyev, Oliy majlis Qonunchilik palatasi spikeri Dilorom Toshmuhammedova, parlament a’zolari, o‘zbek estradasi yulduzlari hamda OAV vakillari qatnashdi.
AQSh elchisi Jorj Krol nutq so‘zlab, sharoitga ko‘ra, ish safarining nihoyasi sababli bu nutqi diyorimizdagi oxirgisi ekanligini ta’kidlab o‘tdi. Nutqida yurtimiz haqida juda iliq gaplar aytdi.
“Bu diyorda 4 yildan buyonman. Avvaliga yurt sog‘inchi qalbimni o‘rtardi. Biroq bu yerning odamlari shu darajada mehmondo‘st, ko‘ngli toza va mehrli ekanlarki, u tuyg‘u meni birpastdan tark etdi. Men bu elning deyarli hamma joylarida bo‘ldim. Sizlar menga o‘z tilingizni, urf-odatlaringizni, o‘rnak bo‘ladigan ota-ona hamda farzand o‘rtasidagi munosabatlarni o‘rgatdingiz”, — dedi u.
Elchining aytishicha, “u bu zaminga emas, bu zamin unga ko‘proq narsa berdi”. “Bu yerdan ketar ekanman,o‘zim bilan ajoyib taassurotlar olib ketayapman. Men shuni baralla aytishim mumkinki, O‘zbekiston mening bir bo‘lagim bo‘lib qoldi”, — dedi Kroll.
Eslatib o‘tamiz, AQSh prezidenti Barak Obama Jorj Krolni AQSh senatiga Qozog‘iston elchisi lavozimiga tavsiya etgan. AQShning O‘zbekistondagi elchisi kim bo‘lishi esa hali aniq emas.
Izoh (0)