Toshkentda O‘zbekiston sharoitida xonbaliq yetishtirishning zamonaviy texnologiyalariga bag‘ishlangan seminar-trening bo‘lib o‘tdi. Mazkur seminar-treningdan ko‘zlangan maqsad sohada orttirilgan ilmiy tajribani fermerlar, tadbirkorlar o‘rtasida keng ommalashtirish, baliqchilik tarmog‘ini rivojlantirishga ko‘maklashishdir, deya xabar beradi O‘zA.
O‘zbekiston Fanlar akademiyasi O‘simlik va hayvonot olami genofondi instituti va Global ekologik jamg‘armaning kichik grantlar dasturi hamkorligida tashkil etilgan tadbirda vazirlik va idoralar, jamoat va xalqaro tashkilotlar vakillari, olimlar, fermerlar, tadbirkorlar ishtirok etdi.
— Asli vatani Shimoliy Amerika bo‘lgan xonbaliq tabiiy sharoitga moslashuvchanligi, ozuqani faol iste’mol qilishi, tez ko‘payishi, serdaromadliligi jihatidan dunyoning ko‘plab mintaqalarida tadbirkorlik hamda ekoturizmning muhim obyekti bo‘lib xizmat qilmoqda, — deydi O‘zFA O‘simlik va hayvonot olami genofondi instituti gidrogeologiya va ixtiologiya laboratoriyasi katta ilmiy xodimi Baxtiyor Komilov. – Asosan, tog‘oldi va tog‘li hududlarda, sovuq suvda yashashga moslashgan bu baliqni hatto qish kunlarida ham ko‘paytirish imkoniyati mavjud.
Seminar-trening doirasida Yunusobod tumanida joylashgan “Zenit elektroniks” mas’uliyati cheklangan jamiyatidagi xonbaliq yetishtirishga ixtisoslashgan yordamchi xo‘jalikning inkubatsiya sexi va sun’iy suv havzasiga ekspeditsiya tashkil etildi.
— Xonbaliq darmondorilarga boyligi, to‘yimliligi, uni yil bo‘yi boqish, ko‘paytirish, mahsulotni el dasturxoniga yetkazib berish, shuning barobarida eksportni yo‘lga qo‘yish imkoniyatlari mavjudligi bizga, ayniqsa, manzur bo‘ldi, — dedi Bo‘stonliq tumanidan kelgan tadbirkor Ulug‘bek Oripov.
Izoh (0)