Jizzax viloyatining Zomin tumanidagi Pshag‘ar qishlog‘ida tarixiy o‘lkashunoslik muzeyi ochildi. Viloyat o‘lkashunoslik muzeyi Zomin filialining bo‘limi sifatida faoliyat yuritadigan ushbu maskanga 500 dan ziyod eksponat qo‘yildi. Bu haqda O‘zA xabar berdi.
Prezident rahnamoligida qishloq infratuzilmasini rivojlantirish, aholi uchun munosib turmush sharoiti yaratish borasida amalga oshirilayotgan keng ko‘lamli islohotlar samarasida Pshag‘ar qishlog‘i har tomonlama obod maskanga aylandi. O‘ndan ziyod ishlab chiqarish tarmog‘i, savdo va maishiy xizmat ko‘rsatish shoxobchalari, dehqon bozori, zamonaviy qiyofadagi agrosanoat kasb-hunar kolleji binosi barpo etildi. Tarixiy, milliy qadriyatlarimizni tiklash borasidagi chora-tadbirlar doirasida “Xo‘jai Serob ota” ziyoratgohi tubdan ta’mirlandi.
1994-yildan buyon qishloqda O‘zbekiston Fanlar akademiyasi Yahyo G‘ulomov nomidagi Arxeologiya instituti olimlari ilmiy izlanish olib bormoqda. Mutaxassislar qishloq yaqinidagi To‘rtko‘ltepa IX-XII asrlarda Buyuk ipak yo‘lidagi muhim madaniy, iqtisodiy, strategik inshoot bo‘lgan degan xulosaga keldi. Bu yerdan topilgan 160 kvadrat metrli to‘g‘ri to‘rtburchak shaklidagi arxeologik inshoot Markaziy Osiyo hududidagi qadimiy karvonsaroylarning eng yirigi hisoblanadi. Qishloqdan topilgan topilma va inshootlar qoldiqlariga yevropalik, xususan, fransiyalik arxeolog olimlar katta qiziqish bildirmoqda.
Uzoq o‘tmish bilan bog‘liq ana shu topilmalar, ilmiy xulosalar, keksalarning fikrlari o‘lkashunoslik muzeyi barpo etilishiga asos bo‘ldi. Mehnat faxriysi Abdug‘ani Ilashev, maktab o‘qituvchisi Abdug‘ani Mamatqulov kabi tashabbuskorlar sa’y-harakati, qishloq ahli ko‘magida muzey tashkil etildi. Arxeologik qazish ishlari davomida topilgan, ayrim xonadonlarda saqlanib kelayotgan tarixiy ahamiyatga molik sopol, chinni va temir buyumlar, kitoblardan iborat 500 dan ziyod eksponat muzeyga qo‘yildi.
Eksponatlar orasida III, V, VIII asrlarga oid sopol idishlar, mis va kumush tangalar, harbiy qurollarning ayrim qismlari, dehqonchilik asboblari, toshbosma kitoblar, bezak, hunarmandchilik buyumlari bor. Eksponatlar viloyat o‘lkashunoslik muzeyi mutaxassislari, O‘zFA Arxeologiya instituti ilmiy xodimlari tomonidan tasniflanib, xronologik tartibda joylashtirildi.
– Zomin nafaqat xushmanzara tabiati, balki tarixiy yodgorliklari bilan ham mashhur, – deydi mehnat faxriysi A.Ilashev. – “Xo‘jai Serob ota” ziyoratgohi, Pshag‘ar g‘orini ko‘rish uchun kelayotgan xorijlik sayyohlar safi yil sayin kengayib bormoqda. Muzeyning tashkil etilishi qishloqning turistik salohiyatini oshirishda muhim ahamiyat kasb etadi. Ayni paytda qishloqda sayyohlarga qulaylik yaratish, xizmat ko‘rsatish tizimini rivojlantirishga ham alohida e’tibor qaratilmoqda. Bir necha xususiy mehmonxona va ekskursovodlar sayyohlar xizmatida. Pshag‘ar qishlog‘i viloyatda ekoturizmni rivojlantirish bo‘yicha amalga oshirilgan yangi loyihaning muhim yo‘nalishlaridan biriga aylanmoqda.
Izoh (0)