O‘zbekistonda avtomobillarga videoregistrator o‘rnatishga ruxsat berilmaydi. Bu haqda 27-may kuni Ichki ishlar vazirligi Yo‘l harakati xavfsizligi bosh boshqarmasi vakillari to‘g‘ridan-to‘g‘ri muloqot chog‘ida ma’lum qildi, deya xabar berdi Gazeta.uz.
Boshqarma vakillarining ta’kidlashicha, haydovchini qoidabuzarlik uchun to‘xtatgan Yo‘l harakati xavfsizligi davlat xizmati xodimini videoga tushirish ham mumkin emas.
“Avtomobilga navigator, videoregistrator yoki orqani ko‘rib turish maqsadida kamera o‘rnatish mumkinki?” — degan savolga javoban “Bizda bunday turdagi qurilma va uskunalarni o‘rnatish taqiqlangan”, — deya ta’kidlandi.
YHXDX xodimlari videoregistrator o‘rnatilgan holatni yo‘l harakati xavfsizligi qoidalarining buzilishi sifatida rasmiylashtirish huquqiga ega ekanligi ham aytib o‘tildi.
Shu bilan birga ta’kidlanishicha, orqa o‘rindiqlar tepa qismiga monitor o‘rnatish mumkin: “Qonun tele- va videomonitorlarni transport vositasining old qismiga o‘rnatishni man qiladi”.
Nashrning eslatishicha, O‘zbekiston Ma’muriy kodeksi transport vositasi salonining old qismiga monitorlarni o‘zboshimchalik bilan o‘rnatishni taqiqlaydi. Qoidabuzarlar eng kam oylik ish haqining ikki baravarida jarimaga tortiladi.
Yo‘l-transport hodisasi ro‘y bergan taqdirda videoregistratordagi yozuv sudga dalil sifatida qabul qilinadimi, yo‘qmi, mazmunidagi savolga YHXDX vakillari: “Savolingizga to‘liq va aniq javob olish uchun yaxshisi, sud organlariga murojaat qiling”, — deb javob berishdi.
Izoh (0)