Жиззах вилоятининг Зомин туманидаги Пшағар қишлоғида тарихий ўлкашунослик музейи очилди. Вилоят ўлкашунослик музейи Зомин филиалининг бўлими сифатида фаолият юритадиган ушбу масканга 500 дан зиёд экспонат қўйилди. Бу ҳақда ЎзА хабар берди.
Президент раҳнамолигида қишлоқ инфратузилмасини ривожлантириш, аҳоли учун муносиб турмуш шароити яратиш борасида амалга оширилаётган кенг кўламли ислоҳотлар самарасида Пшағар қишлоғи ҳар томонлама обод масканга айланди. Ўндан зиёд ишлаб чиқариш тармоғи, савдо ва маиший хизмат кўрсатиш шохобчалари, деҳқон бозори, замонавий қиёфадаги агросаноат касб-ҳунар коллежи биноси барпо этилди. Тарихий, миллий қадриятларимизни тиклаш борасидаги чора-тадбирлар доирасида «Хўжаи Сероб ота» зиёратгоҳи тубдан таъмирланди.
1994 йилдан буён қишлоқда Ўзбекистон Фанлар академияси Яҳё Ғуломов номидаги Археология институти олимлари илмий изланиш олиб бормоқда. Мутахассислар қишлоқ яқинидаги Тўрткўлтепа ИXXIИ асрларда Буюк ипак йўлидаги муҳим маданий, иқтисодий, стратегик иншоот бўлган деган хулосага келди. Бу ердан топилган 160 квадрат метрли тўғри тўртбурчак шаклидаги археологик иншоот Марказий Осиё ҳудудидаги қадимий карвонсаройларнинг энг йириги ҳисобланади. Қишлоқдан топилган топилма ва иншоотлар қолдиқларига европалик, хусусан, франсиялик археолог олимлар катта қизиқиш билдирмоқда.
Узоқ ўтмиш билан боғлиқ ана шу топилмалар, илмий хулосалар, кексаларнинг фикрлари ўлкашунослик музейи барпо этилишига асос бўлди. Меҳнат фахрийси Абдуғани Илашев, мактаб ўқитувчиси Абдуғани Маматқулов каби ташаббускорлар саъй-ҳаракати, қишлоқ аҳли кўмагида музей ташкил этилди. Археологик қазиш ишлари давомида топилган, айрим хонадонларда сақланиб келаётган тарихий аҳамиятга молик сопол, чинни ва темир буюмлар, китоблардан иборат 500 дан зиёд экспонат музейга қўйилди.
Экспонатлар орасида III, В, ВIIIасрларга оид сопол идишлар, мис ва кумуш тангалар, ҳарбий қуролларнинг айрим қисмлари, деҳқончилик асбоблари, тошбосма китоблар, безак, ҳунармандчилик буюмлари бор. Экспонатлар вилоят ўлкашунослик музейи мутахассислари, ЎзФА Археология институти илмий ходимлари томонидан таснифланиб, хронологик тартибда жойлаштирилди.
– Зомин нафақат хушманзара табиати, балки тарихий ёдгорликлари билан ҳам машҳур, – дейди меҳнат фахрийси А.Илашев. – «Хўжаи Сероб ота» зиёратгоҳи, Пшағар ғорини кўриш учун келаётган хорижлик сайёҳлар сафи йил сайин кенгайиб бормоқда. Музейнинг ташкил этилиши қишлоқнинг туристик салоҳиятини оширишда муҳим аҳамият касб этади. Айни пайтда қишлоқда сайёҳларга қулайлик яратиш, хизмат кўрсатиш тизимини ривожлантиришга ҳам алоҳида эътибор қаратилмоқда. Бир неча хусусий меҳмонхона ва экскурсоводлар сайёҳлар хизматида. Пшағар қишлоғи вилоятда экотуризмни ривожлантириш бўйича амалга оширилган янги лойиҳанинг муҳим йўналишларидан бирига айланмоқда.
Изоҳ (0)