Buxoro viloyatining Jondor tumanida haydovchi Cobalt’ni qasddan YPX xodimi ustiga haydadi. Holat aks etgan video ijtimoiy tarmoqlarda tarqaldi.
Yo‘l harakati xavfsizligi xizmatining ma’lum qilishicha, voqea 28-yanvar kuni soat 12:34 larda sodir bo‘lgan. YPX xodimi qoidani buzib, boshqa harakat ishtirokchilariga halaqit berib to‘xtab turgan Cobalt avtomobili haydovchisiga ushbu qoidabuzarlik uchun ma’muriy bayonnoma rasmiylashtirilishini ma’lum qilgan.
Shundan so‘ng haydovchi xodimning qonuniy talabini bajarmasdan, uning ustiga qasddan avtomobilini boshqarib, uni urib yuborgan va ushbu yo‘nalishida harakatlanib kelayotgan Matiz bilan to‘qnashgan.
Oqibatda YPX xodimi tan jarohatlari olgan, u shifoxonaga yotqizilgan.
Holat yuzasidan Jondor tumani prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, gumonlanuvchi ushlangan.
19-yanvar kuni Navoiyda 16 yoshli bola otasining mashinasida YPX xodimini urib yuborib, uning o‘limiga sababchi bo‘lgandi.
Izoh (0)