Ijtimoiy tarmoqlarda Toshkent shahrida YPX xodimi qoidabuzar mashinani to‘xtataman deganida avariya bo‘lgani va YPX xodimining o‘zi bir chekkaga uchib ketgani tasvirlangan video tarqaldi. Poytaxt IIBB sodir bo‘lgan voqea yuzasidan ma’lumot berdi.
Ma’lum qilinishicha, videoda tasvirlangan voqea 2021-yilning 23-sentabr kuni soat 07:30 larda Yunusobod tumani Amir Temur ko‘chasida sodir bo‘lgan.
Toshkent shahar IIBB YHXB YPXB inspektori kichik serjant Anvar Otaboyev xizmat vazifasini o‘tash jarayonida 49 yoshli SH.U. boshqaruvidagi Cobalt rusumli avtomashinani hushtak va jezl orqali to‘xtatgan. Shu vaqt uning orqasidan harakatlanib kelayotgan 32 yoshli K.U. boshqaruvidagi Tracker Cobalt bilan to‘qnashib ketgan va xizmat olib borayotgan YHXB inspektorini urib yuborib, ag‘darilib, daraxtga urilgan.
YTH natijasida YHXB inspektori hamda Tracker avtomashinasining yo‘lovchisi D.U. tan jarohatlari olib kasalxonaga yotqizilgan.
Mazkur holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan. Tergov yakuni bo‘yicha to‘plangan hujjatlar qonuniy qaror qabul qilish uchun sudga yuborilgan. Ta’kidlanishicha, hozirda YHXB xodimining ahvoli yaxshi.
Avvalroq Farg‘onada Tracker va Gentra to‘qnashuvi oqibatida yo‘lovchi halok bo‘lgani, Toshkentda 4 ta mashina ishtirokida YTH yuz bergani, Andijonda 20 yoshli haydovchi boshqaruvidagi Nexia ag‘darilgani to‘g‘risida xabar berilgandi.
Izoh (0)