“Sanoat, radiatsiya va yadro xavfsizligi sohasida davlat nazoratini takomillashtirish bo‘yicha qo‘shimcha chora-tadbirlar to‘g‘risida”gi prezident farmoni qabul qilindi.
Farmonga ko‘ra, Sanoat, radiatsiya va yadro xavfsizligi qo‘mitasi raisi va uning o‘rinbosarlari zimmasiga 2025-yilda bir qator vazifalar yuklandi.
Jumladan:
- sanoat, radiatsiya va yadro xavfsizligi hamda istirohat bog‘lari attraksionlaridan foydalanishdagi xavfsizlik talablarini qayta ko‘rib chiqish;
- radiatsiya va yadro xavfsizligi sohasidagi xalqaro standartlar va talablarni milliy qonunchilikka joriy etish;
- sanoat xavfsizligini ta’minlashda masofadan nazorat qilish mexanizmini joriy etish;
- sanoat, radiatsiya va yadro xavfsizligi to‘g‘risidagi qonunchilik talablarini buzganlik uchun javobgarlikni kuchaytirish.
Tog‘-kon sanoati va geologiya sohasini nazorat qilish inspeksiyasining metallurgiya tarmog‘ida xavfsizlikni nazorat qilish funksiyasi qo‘mitaga o‘tkaziladi. Inspeksiya tuzilmasidagi Bekobod kon-texnika inspeksiyasi tugatiladi.
Sanoat, radiatsiya va yadro xavfsizligi qo‘mitasi tuzilmasida quyidagilar tashkil etiladi:
- Navoiy sanoat xavfsizligi inspeksiyasi;
- Olmaliq sanoat xavfsizligi inspeksiyasi;
- Bekobod sanoat xavfsizligi inspeksiyasi;
- Temiryo‘l sanoat xavfsizligi inspeksiyasi.
Sanoat xavfsizligi sohasini to‘liq raqamlashtirish maqsadida qo‘mita 2025-yil yakunigacha “Yagona integratsiyalashgan ekotizim” axborot tizimini ishga tushiradi va boshqa vazirlik va idoralarning axborot tizimlari va resurslari bilan integratsiya qilinadi.
2025-yil 1-iyuldan sanoat, radiatsiya va yadro xavfsizligi sohasidagi belgilangan huquqbuzarliklar uchun yuridik shaxslarga jarima qo‘llash tartibi joriy etiladi.
Izoh (0)