Baxtiyor Ibragimov O‘zbekistonning Albaniyadagi (qarorgohi Vena shahrida joylashgan) birinchi elchisi etib tayinlandi. Bu haqda “Dunyo” AA xabar berdi.
Elchi ushbu mamlakat prezidenti Bayram Begayga ishonch yorliqlarini topshirdi.
Prezident qarorgohida bo‘lib o‘tgan tantanali marosimdan so‘ng o‘tkazilgan muloqot chog‘ida O‘zbekiston va Albaniya o‘rtasidagi ikki tomonlama munosabatlarni rivojlantirish istiqbollari muhokama qilindi.
Savdo-iqtisodiy, madaniy va turizm sohalarida hamkorlikni mustahkamlash masalalariga alohida eʼtibor qaratildi.
Albaniya rahbari so‘nggi yillarda Shavkat Mirziyoyev rahbarligida amalga oshirilayotgan keng ko‘lamli islohotlar va ularning natijalarini yuqori baholadi.
Har ikki tomon munosabatlarni sifat jihatidan yangi bosqichga olib chiqishga tayyor ekanligini tasdiqladi.
Elchi Baxtiyor Ibragimov 2023-yil noyabr oyida Avstriya prezidenti Aleksandr Van der Bellenga ishonch yorliqlarini topshirgan edi.
Shuningdek, u 2023-yilda shtab kvartirasi Vena shahrida joylashgan YXHT, BMT Giyohvand moddalar va jinoyatchilikka qarshi kurashish boshqarmasi, Yadro sinovlarini keng qamrovli taqiqlash to‘g‘risidagi shartnoma tashkiloti, XAEA kabi xalqaro tashkilotlardagi O‘zbekistonning rasmiy vakili sifatida ham akkreditatsiya qilingan.
Baxtiyor Ibragimov 59 yoshda. Toshkent xalq xo‘jaligi institutini (hozir — Toshkent davlat iqtisodiyot universiteti) tamomlagan.
U 1992-yildan beri TIV tizimida ishlab kelmoqda. Vazirlik markaziy apparatida, shuningdek, O‘zbekistonning AQSH va Janubiy Koreyadagi elchixonalarida turli lavozimlarda faoliyat ko‘rsatgan.
Izoh (0)