Бахтиёр Ибрагимов Ўзбекистоннинг Альбаниядаги (қароргоҳи Вена шаҳрида жойлашган) биринчи элчиси этиб тайинланди. Бу ҳақда “Дунё” АА хабар берди.
Элчи ушбу мамлакат президенти Байрам Бегайга ишонч ёрлиқларини топширди.
Президент қароргоҳида бўлиб ўтган тантанали маросимдан сўнг ўтказилган мулоқот чоғида Ўзбекистон ва Альбания ўртасидаги икки томонлама муносабатларни ривожлантириш истиқболлари муҳокама қилинди.
Савдо-иқтисодий, маданий ва туризм соҳаларида ҳамкорликни мустаҳкамлаш масалаларига алоҳида эътибор қаратилди.
Альбания раҳбари сўнгги йилларда Шавкат Мирзиёев раҳбарлигида амалга оширилаётган кенг кўламли ислоҳотлар ва уларнинг натижаларини юқори баҳолади.
Ҳар икки томон муносабатларни сифат жиҳатидан янги босқичга олиб чиқишга тайёр эканлигини тасдиқлади.
Элчи Бахтиёр Ибрагимов 2023 йил ноябрь ойида Австрия президенти Александр Ван дер Белленга ишонч ёрлиқларини топширган эди.
Шунингдек, у 2023 йилда штаб квартираси Вена шаҳрида жойлашган ЕХҲТ, БМТ Гиёҳванд моддалар ва жиноятчиликка қарши курашиш бошқармаси, Ядро синовларини кенг қамровли тақиқлаш тўғрисидаги шартнома ташкилоти, ХАЭА каби халқаро ташкилотлардаги Ўзбекистоннинг расмий вакили сифатида ҳам аккредитация қилинган.
Бахтиёр Ибрагимов 59 ёшда. Тошкент халқ хўжалиги институтини (ҳозир — Тошкент давлат иқтисодиёт университети) тамомлаган.
У 1992 йилдан бери ТИВ тизимида ишлаб келмоқда. Вазирлик марказий аппаратида, шунингдек, Ўзбекистоннинг АҚШ ва Жанубий Кореядаги элчихоналарида турли лавозимларда фаолият кўрсатган.
Изоҳ (0)