Modellarning mukammal tanasi fotoshop yoki genlar emas, balki intizom natijasidir. Ularning kuni puxta rejalashtirilgan nonushta, qomat hamda quvvatni saqlab turishga yordam beradigan mashg‘ulotlar bilan boshlanadi.
Jizel Byundxen: smuzi, avokado va yoga bilan boshlanadigan tong
Jizel Byundxen — moda olamini kuzatib boradigan har bir kishiga tanish ism. Jizelning nonushtasi oddiy, ammo foydali: ko‘katli smuzi va avokadoli tost. Yengil, vitaminlarga boy va to‘yimli bo‘lgan bu nonushta tanaga og‘irlik qilmaydi.
Foydali nonushtadan tashqari, modelning qomatini tetik saqlashga va kuch-quvvatini to‘ldirishga yordam beradigan yana bir odati bor — yoga. Ijtimoiy tarmoqlardagi sahifasida Jizel yoga va meditatsiya yordamida Tom Bredi bilan ajrashganidan keyingi og‘ir davrni yengib o‘tib, yanada kuchliroq va baxtliroq bo‘lganini aytgan. Jizel har qanday qiyinchilik shunchaki sinov emas, balki o‘zgarish uchun imkoniyat ekanligini anglab yetdi.
Bella Hadid: sosiskali quymoq va mashqlar
Bella Hadid eng mashhur va talabgir modellardan biri hisoblanadi. Uning tashqi nafosati ortida o‘z ustida qilgan ulkan mehnati va sog‘lig‘iga bo‘lgan e’tibori yotadi. Vaqti bo‘lganda, to‘yimli nonushtadan voz kechmaydi. “Ertalab bo‘sh vaqtim bo‘lsa, to‘yib nonushta qilishni ma’qul ko‘raman”, deydi Bella. Eng yaxshisi sosiska va qaynatilgan tuxum, ammo vaqt ziq bo‘lganda tezroq tayyorlanadigan variantga ko‘nadi: tuxumli buterbrod.
Aynan shunday ertalabki taom Bellaning kun davomida tetik yurishiga yordam beradi. To‘yimli nonushtadan so‘ng Bella shaxsiy murabbiyi bilan mashq qiladigan sport zaliga yo‘l oladi. Uning dasturida kuch va yurak-qon tomir tizimini rivojlantiruvchi mashqlar uyg‘unlashgan. Bular mushaklar tonusini saqlashga va ortiqcha kaloriyalarni yoqishga yordam beradi. Mashg‘ulotlar uning hayot tarzining ajralmas qismi bo‘lib, nafaqat kundalik hayotda, balki podiumda ham o‘ziga ishonch bag‘ishlaydi.
Kaya Gerber: suli bo‘tqasi, pilates va oilaviy sayr
Afsonaviy Sindi Kroufordning qizi Kayya Gerber onasining modellik ko‘rinishini meros qilib olgan bo‘lsa-da, baribir sog‘lig‘i va jismoniy holatini diqqat bilan nazorat qilib boradi. Kayyaning nonushtasi mazali va foydali taomlarni qanday uyg‘unlashtirish mumkinligiga misol bo‘ladi. Odatda uning tongi rezavor mevalar qo‘shilgan suli bo‘tqasi va bir piyola choy bilan boshlanadi.
Ertalabki ovqatlanishdan so‘ng Kayya pilatesga boradi yoki cho‘zilish mashqlarini bajaradi. Bu mashg‘ulotlar unga mukammal qaddi-qomatni saqlash, egiluvchanlikni oshirish va mushaklarni mustahkamlashga yordam beradi. Pilates, shuningdek, koordinatsiyani yaxshilaydi, bu uning kasbi uchun juda muhim — suratga olish va podiumda nafaqat benuqson ko‘rinish, balki o‘zini ishonchli his qilish ham muhimdir.
Kayya o‘zining sermazmun faoliyatiga qaramay, hatto dam olish kunlarida ham jismoniy faollikdan voz kechmaydi. Deyarli har bir dam olish kunining tongi oila a’zolari bilan birga plyajda velosiped minishdan boshlanadi. Uning uchun bu kuch-quvvatini tiklash va yaqinlari bilan aloqasini mustahkamlashning eng yaxshi usuli hisoblanadi.
Adriana Lima: oqsilli kokteyl va boks
Adriana Lima ham dunyoning eng mashhur modellaridan biri. U uchun ertalabki nonushta muhim hisoblanadi. Mevali oqsil kokteyli unga mashg‘ulotlardan keyin tez tiklanish uchun zarur bo‘lgan barcha narsani beradi.
Adriana jismoniy yuklamalardan qo‘rqmaydigan ayollardan. “Men yugurish, suzish, yoga va velosiped trenajyorini o‘rganishga harakat qildim, ammo har safar zerikib qolardim”, deb tan olgan Adriana suhbatlarining birida. Shuning uchun u ko‘pincha boks yoki HIIT kabi mashg‘ulotlarni tanlaydi. Bu mashqlar nafaqat uning chidamliligini oshiradi, balki kaloriyalarni samarali yoqadi ham.
Izoh (0)