Rossiya Qirg‘izistonda kichik quvvatli atom stansiyasi (AES) qurishga tayyorligini bildirdi. Bu haqda “Rosatom” rahbari Aleksey Lixachev “Izvestiya”ga bergan intervyusida ma’lum qildi.
Lixachevning so‘zlariga ko‘ra, Qirg‘iziston avvalo loyihaning aniq parametrlarini belgilab olishi zarur.
Bir necha yil oldin kun tartibiga kiritilgan masala — Qirg‘izistonda kichik atom elektr stansiyasi qurish. Biz hamkorlarimizga an’anaviy mahsulotimizni taklif etdik. Bu mahsulot bo‘yicha O‘zbekiston bilan shartnomalar imzolangan, Myanma bilan muzokaralar olib borilmoqda va biz Yakutiyada ham shunday stansiya quryapmiz.
Hozirda hamkorlarimiz bosqichlarni va kerakli quvvat darajasini aniqlamoqda. Ular ushbu loyihaning aniq konfiguratsiyasi bo‘yicha so‘rov shakllantirgach, umid qilamanki, biz uni amalga oshirishga kirishamiz, dedi “Rosatom” rahbari.
U 110 MVt dan 440 MVt gacha quvvatga ega bo‘lgan blokli atom elektr stansiyasini qurishga tayyor ekanliklarini qayd etdi.
O‘zbekiston va Rossiya o‘rtasida 2024-yil 27-mayda imzolangan shartnoma bo‘yicha Jizzax tumanida har biri 55 MVt quvvatga ega 6 ta reaktordan iborat kam quvvatli AES quriladi. “O‘zatom” agentligi direktori Azim Ahmadxo‘jayev loyiha xarajatlari 2 milliard dollardan oshmasligini aytgandi.
Stansiyaning narxi ikki milliard dollardan kam bo‘ladi. Bu biz ko‘zlagan maqsad. Men aniq raqam haqida gapirishni istamayman, chunki biz doimiy ravishda uni optimallashtirish ustida ishlayapmiz, har bir detal narxlari bo‘yicha muzokaralar davom etyapti... Biz Rossiya mablag‘larini ko‘rib chiqmaymiz. Chunki barcha geosiyosiy jarayonlarni hisobga olamiz, degan edi u mart oyidagi intervyusida.
Izoh (0)