2022-yilda Madonna avtobiografik film ustida ish boshlagani haqida xabarlar tarqalgan edi. Endilikda ma’lum bo‘lishicha, muxlislarni kino emas, balki Netflix platformasida namoyish etiladigan bir necha qismli serial kutmoqda.
Deadline nashrining yozishicha, loyiha hozirda dastlabki ishlab chiqish bosqichida. Serial prodyuseri sifatida “Ideal juftlik”, “Ko‘rinmas nur” seriallari hamda “Asosiy qahramon” va “Dedpul va Rosomaxa” filmlari rejissyori Shon Levi ishlamoqda.
Ta’kidlanishicha, miniserial ilgari Universal studiyasi tomonidan suratga olinishi rejalashtirilgan to‘liq metrajli biografik filmga aloqador emas. O‘sha vaqtda filmda pop musiqaning qirolichasi rolini uch karra “Emmi” mukofoti sohibasi Julia Garner ijro etishi ko‘zda tutilgan edi.
Hozircha Madonna karyerasining aynan qaysi davri serialda yoritilishi noma’lum. Shunga qaramay, ko‘pchilik “Ozark” seriali yulduzi Julia Garner ushbu serialda ham Madonnaning obrazini gavdalantirishiga ishonmoqda. Sababi, 2023-yilda Garner xonandaning “Celebration Tour” gastrol konserti doirasida sahnada u bilan birga ko‘rinish bergan edi. Bu esa aktrisaning yosh Madonna roliga tanlanishini qo‘llab-quvvatlaganini ko‘rsatadi.
Madonna bir necha bor o‘z hayot yo‘lini ekran orqali ko‘rsatish istagini bildirgan.
“Bu dunyoda hali aytilmagan ko‘plab ilhomlantiruvchi hikoyalar bor, ularni mendan yaxshiroq kim hikoya qilib bera oladi?”, degan edi u.
Izoh (0)