Boylik va mashhurlik doim ham farzandlarga meros bo‘lib qolmaydi. AQSHda va ayrim Yevropa davlatlarida badavlat ota-onalar farzandi voyaga yetgach unga moddiy yordam bermaslik orqali mustaqil hayotga o‘rgatadi. Shou-biznes olamidagi biz tanigan mashhurlar ham ana shunday kunlarni boshidan o‘tkazgan. Quyida ota-onalarining keng imkoniyatlariga qaramay, moliyaviy qiyinchiliklar bilan uzoq vaqt kurashgan (yoki kurashishda davom etayotgan) yulduzlar haqida hikoya qilamiz.
Devid Banda
Amerikalik xonanda Madonnaning asrab olingan o‘g‘li Devid bolaligida to‘kin-sochinlikda ulg‘aygan. Ammo uning onasi o‘g‘li ustidan doimiy nazorat qiluvchi va cheklab qo‘yuvchi harakatlar qilmaydi, Devid mustaqil tirikchilik qilishi uchun unga erkinlik beradi. Hozirda Banda musiqa sohasida faoliyat yuritib kelmoqda.
Yaqin orada Devid Banda o‘zining Instagram sahifasida qo‘ygan fotosurati ostida quyidagi satrlarni yozib qoldirdi: “Mana, kechki soat to‘qqiz ham bo‘ldi. Mening qornim och va ovqat sotib olish uchun pulim yetmaydi. Buning uchun endi men chiqindi yig‘ishim kerak”.
Mustaqil hayot haqidagi Devidning so‘zlarini ko‘pchilik noto‘g‘ri tushundi va Madonna o‘gay o‘g‘lini uyidan haydab yuborgani haqida yolg‘on mish-mishlar tarqaldi. Devid bu taxminlarni darhol rad etdi va mustaqil turmush tarzi unga juda yoqishini ta’kidlab o‘tdi.
U gitara chalish bo‘yicha dars o‘tadi. Garchi Devidning maoshi katta bo‘lmasa-da, qallig‘i Mariya Atuesta uni doimo qo‘llab-quvvatlaydi.
Ma’lumot uchun: xonanda Madonna Malavi davlatidan to‘rt nafar bolani asrab olgan. U 2006-yilda o‘g‘li Devid Banda Mvaleni, uch yildan keyin esa qizi Chikundo Mersi Jeymsni asrab olgan. Madonna 2017-yilda egizaklari Stella va Esterning vasiyligini oldi. Shuningdek, xonandaning aktyor Karlos Leondan Lourdes ismli qizi va rejissyor Gay Richi bilan turmushidan Rokko Jon ismli o‘g‘li bor.
Dakota Jonson
Dakotaning otasi, aktyor Don Jonson qizi 16 yoshga to‘lganida unga moliyaviy yordam berishni to‘xtatdi. Intervyulardan birida u sobiq rafiqasi, aktrisa Melani Griffit bilan kelishib olgani, agar Dakota oliy o‘quv yurtiga kirishga qaror qilsa, uning o‘qish pulini to‘lashga rozi ekanini aytgan. Agar u boshqa yo‘lni tanlasa, o‘zini-o‘zi boqishga majbur bo‘lishi haqida ogohlantirgan. Dakota ikkinchi yo‘lni tanladi va shou-biznes olamiga kirishga qaror qildi. U kundalik ehtiyojlarga pul topish uchun model sifatida ish boshlagan.
Qo‘shimcha o‘rnida: Dakotaning onasi Melani Griffit o‘z davrining mashhur aktrisasi bo‘lib, u Gollivuddagi ko‘plab yulduzlar singari muhojirlar oilasidan bo‘lgan. Ular Amerikaga Shvetsiyadan kelgan, otasining ajdodlari esa norveg va nemis bo‘lgan.
Tori Spelling
Tori Spelling “Beverli Hills, 90210” yulduzi va taniqli prodyuser Aaron Spellingning qizi bo‘lib, 2006-yilda otasidan katta meros qoladi. Biroq Tori ko‘pchilik kutganidan ancha kam miqdorda ulushga ega bo‘ldi. Umumiy boyligi 500 million dollarga baholangan ota Toriga atigi 800 ming dollarni vasiyat qilgan. Qolganlari Torining onasi Kendi Spellingga berilgan.
Keyinchalik aktrisa o‘zining moliyaviy qiyinchiliklari haqida tez-tez so‘zlab beradigan bo‘ldi. Uning fikricha, voqealarning bunday rivoji Torini firibgar yoki o‘g‘ri bo‘lib qolishdan qaytargan.
Gvinet Peltrou
Badavlat oilada tug‘ilgan ba’zi insonlar barchasini noldan boshlashni va moliyaviy mustaqillikka erishishni bolaligidan xohlaydi. Mustaqillikka bo‘lgan katta istagi tufayli Gvinet Peltrou 16 yoshidan boshlab o‘zini ta’minlay olgan. Intervyulardan birida yulduz ta’kidlashicha, uning ota-onasi Blayt Danner va Bryus Peltrou qizlarini imkon qadar tezroq mustaqil ravishda pul ishlashni o‘rganishi kerak degan tushuncha bilan tarbiyalagan. “O‘smirlik davrimdan boshlab men ota-onamdan bir sent ham olmadim va shu orqali o‘z-o‘zim qaytadan kashf etdim”, deydi aktrisa.
Izoh (0)