Andijon viloyati IIB Yo‘l harakati xavfsizligi boshqarmasi harakatlanayotgan Gentra avtomobilidan tanasi chiqargan qiz videosi yuzasidan ma’lumot berdi.
Qayd etilishicha, 4-iyun kuni soat 23:50 larda Andijon shahar Milliy tiklanish ko‘chasida 20 yoshli K.A. o‘zining Gentra rusumli transport vositasini boshqarib ketayotganida (tegishli hujjatlarsiz boshqargan va YPX xodimining qonuniy talabiga bo‘ysunmagan) yo‘lovchi sifatida old o‘rindiqda bo‘lgan 17 yoshli T.M. transport vositasining salon qismidan tanasini chiqargan.
Mazkur holat yuzasidan, o‘tkazilgan tezkor surishtiruv ishlari davomida qoidabuzar hamda huquqbuzar shaxslar aniqlanib, ularga qonun doirasida tegishli tartibda chora ko‘rilgan va profilaktik tushuntirish ishlari olib borilgan.
Shuningdek, Farg‘ona viloyatida mashina lyukidan voyaga yetmagan yo‘lovchining tanasini chiqarishga yo‘l qo‘yib bergan Onix haydovchisi javobgarlikka tortildi. Unga nisbatan Maʼmuriy javobgarlik to‘g‘risidagi kodeksning 128-moddasiga (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) asosan maʼmuriy bayonnoma rasmiylashtirilgan.
Bundan oldin Qoraqalpog‘istondagi to‘yda tanasini mashinadan chiqarib tasvirga olgan operatorlar va haydovchi jarimaga tortilgan edi. Shuningdek, Andijonda 20 yoshli qiz mashinadan tanasini chiqarib harakatlangani, Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi.
Izoh (0)