Ichki ishlar vazirligi “Yirik bozorlarda jamoat tartibini saqlashni taʼminlash tartibi to‘g‘risidagi nizomni tasdiqlash haqida”gi Vazirlar Mahkamasi qarori loyihasini muhokamaga qo‘ydi.
Belgilanishicha:
- Qoraqalpog‘iston Respublikasi, viloyatlar markazlari va Toshkent shahrida joylashgan yirik bozorlarda jamoat tartibini saqlash Milliy gvardiya organlari tomonidan, boshqa hududlardagi yirik bozorlarda jamoat tartibini saqlash ichki ishlar organlari tomonidan amalga oshiriladi;
- tegishli idoraviy qo‘riqlash va yong‘indan saqlash xizmatlari mavjud bo‘lmagan yirik bozorlar Ichki ishlar vazirligi, Milliy gvardiya yoki Favqulodda vaziyatlar vazirligi organlari bilan obyektlarni qo‘riqlash va yong‘in xavfsizligini taʼminlashni tashkil etish bo‘yicha shartnomalar tuzishga majbur;
- yirik bozorlarga tashrif buyuruvchilar shaxsiy buyum va qo‘l yuklarini ko‘zdan kechirish uchun taqdim etishga, zarur hollarda, xodimning talabiga ko‘ra ko‘rikdan o‘tishga majbur;
- yirik bozorlar ularda jamoat tartibini saqlashni taʼminlash uchun talab etiladigan zamonaviy texnik xavfsizlik vositalari bilan majburiy tartibda jihozlanadi;
- xo‘jalik yurituvchi subyektlar tomonidan yirik bozorlarda jamoat tartibini saqlashni taʼminlash uchun talab etiladigan yong‘inga qarshi himoyalash va zamonaviy texnik xavfsizlik vositalari bilan taʼminlash xo‘jalik yurituvchi subyektlarning mablag‘lari hisobidan amalga oshiriladi;
- yirik bozorlarda tashkil etiladigan mavsumiy yarmarkalar o‘tkaziladigan joylarni belgilash bozorda jamoat tartibini saqlashga masʼul bo‘lgan ichki ishlar, Milliy gvardiya yoki Favqulodda vaziyatlar vazirligi organlari rahbarlari bilan kelishilgan holda tasdiqlanadi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:
- 2024-yil 1-oktyabrga qadar hududlarda joylashgan yirik bozorlarni ularning kadastr hujjatlariga asosan, shaharsozlik meʼyorlaridan kelib chiqqan holda xo‘jalik yurituvchi subyektlar mablag‘lari hisobidan temir panjaralar bilan o‘rab olinishini taʼminlaydi;
- xo‘jalik yurituvchi subyektlar tomonidan yirik bozorlarni jamoat tartibini saqlash bo‘yicha qo‘riqlash muhandislik-texnik vositalari bilan jihozlashning belgilangan talablar asosida amalga oshirilishini taʼminlaydi;
- Ichki ishlar vazirligi, Milliy gvardiya, Favqulodda vaziyatlar vazirligi, Soliq qo‘mitasi bilan birgalikda xo‘jalik yurituvchi subyektlarda ushbu qaror bilan tasdiqlangan nizom talablari yuzasidan kompleks chora-tadbirlar ko‘rib borilishini taʼminlaydi;
- yirik bozorlar va tadbirkorlik subyektlariga o‘rnatilgan zamonaviy texnik xavfsizlik vositalari Ichki ishlar vazirligi, Milliy gvardiya va Favqulodda vaziyatlar vazirligi hududiy bo‘linmalarining situatsion markazlariga integratsiya qilinishini hamda obyektlardagi qo‘riqlash texnik vositalarining maʼlumotlari operator xonasiga uzatilishini taʼminlaydi.
Eslatib o‘tamiz, prezident yanvar oyida bozorlarning o‘ziga xos jihatlarini saqlab qolgan holda ularni O‘zbekistonning tashrif qog‘oziga aylantirish kerakligini ta’kidlagandi. Fevral oyida ayrim shahar va shaharchalarning bosh rejalari yo‘qligi sababli faqat eniga kengayayotganini, bu infratuzilma xarajatlari oshishiga olib kelayotganini aytgandi.
Izoh (0)