AQSHning O‘zbekistondagi elchixonasining yangi sayti ish boshladi. Bu haqda elchixona Telegram’dagi kanalida xabar berdi.
Qayd etilishicha, 10-iyundan eʼtiboran, iyul va kelgusi oylar uchun noimmigratsion viza suhbat o‘rnini yangi veb-saytda belgilash mumkin bo‘ladi. Yangi veb-sayt ishga tushgach, mijozlar onlayn viza suhbat sanasini belgilashdan avval viza uchun to‘lovni amalga oshirishlari kerak bo‘ladi.
Shuningdek, Toshkentning markazida pasportlarni taqdim etish uchun yangi qulay joy va qo‘shimcha to‘lov orqali O‘zbekiston bo‘ylab hujjatni to‘g‘ridan to‘g‘ri uyga yoki ofisga yetkazish xizmatini taklif etishni boshlaydi.
Avvalgi suhbat tizimidan foydalangan holda iyun oyi uchun suhbat sanasini belgilagan viza murojaatchilari, belgilangan sanada viza suhbatiga kelishlari va viza uchun to‘lovni binoning ichida suhbatdan avval amalga oshirishlari kerak bo‘ladi.
Ushbu yangi tizimning joriy etilishi, viza murojaatchilari uchun doimiy ravishda xizmatlarni yaxshilash uchun qilayotgan saʼy-harakatlarining bir qismidir. Elchixona veb-sayti ushbu o‘zgarishlar bo‘yicha maʼlumotning eng yaxshi manbai bo‘lib qoladi, — deyiladi xabarda.
Eslatib o‘tamiz, Toshkentdagi AQSH elchixonasi 2024-yilning 13-fevralidan eʼtiboran, barcha noimmigratsion viza murojaatchilaridan, aynan suhbatga ro‘yxatdan o‘tish vaqtida foydalanilgan DS-160 anketasini suhbat kuni ham taqdim etishlarini talab qilishni boshlashlari haqida ogohlantirgan edi.
Izoh (0)