Saudiya Arabistoni Qurbon hayitini 6-iyun kuni nishonlaydi. Qirollikda zulhijja hiloli ko‘rindi. Bu haqda Al Arabiya xabar berdi.
Islom qamariy taqvimining o‘n ikkinchi va oxirgi oyi — zulhijja oyining birinchi kuni Saudiya Arabistonida 28-mayga to‘g‘ri keladi. Musulmonlarning ikki yirik bayramidan biri bo‘lgan Qurbon hayiti zulhijja oyining 10-kuni nishonlanadi. Shu kuni musulmonlar hayit namoziga yig‘iladi, qarindoshlar va do‘stlari holidan xabar oladi, bir-birlariga sovg‘alar ulashadi. Bayram ovqatlanish va qurbonliklar bilan birga kechadi.
Arafa kuni zulhijja oyining 9-kunida nishonlanadi va islomda eng muhim kunlardan biri hisoblanadi. Bu haj ziyoratining ikkinchi kuni bo‘lib, ziyoratchilar Arafot tog‘i va shu nomdagi vodiyda to‘planadi. Islomning besh ustunidan biri bo‘lgan va Saudiya Arabistonidagi muqaddas Makka shahriga yillik muqaddas ziyorat — haj shu oyda amalga oshiriladi.
Saudiya Arabistoni rasmiy vakillari bu yilgi haj mavsumi uchun chet eldan bir milliondan ortiq ziyoratchilar kelganini ma’lum qildi. Haj bir necha kun davom etib, aniq belgilangan marosimlar ketma-ketligini o‘z ichiga oladi. Haj ziyorati zulhijja oyining 8-kunidan boshlanib, oyning 13-kunigacha davom etadi. Bu yilgi haj marosimi 2025-yilning 4-iyunidan 9-iyunigacha o‘tkazilishi kutilmoqda.
Izoh (0)