Қирғизистонга қарши Кападзенинг янги Ўзбекистони. Ёқимли анъана 9-бор давом этадими?

Футбол бўйича Ўзбекистон миллий терма жамоаси 20 март куни Тошкентдаги “Бунёдкор” стадионида Жаҳон чемпионати саралашидан ўрин олган учрашувлар доирасида Қирғизистонга қарши баҳс олиб боради.

Ушбу ўйин олдидан ҳар икки терма жамоанинг ҳозирги ҳолати, ЖЧга чиқиш имкониятлари ва таркибидаги энг қиммат футболчилари ҳақида сўз боради.

Тошкент. “Бунёдкор” стадиони.

20 март, пайшанба

Жаҳон чемпионати 3-саралаш босқичи

Ўзбекистон — Қирғизистон 21:00

Бош ҳакам: Юсуке Араки (Япония)

Ўзбекистон

Ўзбекистон миллий жамоаси 2026 йил бўладиган футбол бўйича Жаҳон чемпионатига чиқиш учун яхши имкониятга эга. А гуруҳидан жой олган “оқ бўрилар” 13 очко билан 2-ўринни эгаллаб турибди. 6 учрашувдан кейин ўзбекистонликлар 4 ғалаба, 1 дуранг ва 1 мағлубият қайд этган. Жамоа ҳозиргача рақиблар дарвозасига 8 марта гол киритган бўлса, 5 бора ўз дарвозасидан тўп олиб чиққан.

Ўзбекистон термаси солвениялик мураббий Сречко Катанец бошчилигида майдонга тушиб келаётган эди. Бироқ 22 январь куни унинг соғлиғида муаммолар чиқиб, терма жамоа постидан кетди. Унинг ўрнига ўзбек футбол мухлисларига яхши таниш бўлган Темур Кападзе тайинланди. Миллий жамоа Кападзе билан бир ўртоқлик учрашуви ўтказишга ҳам улгурди. 27 январь куни Қатарда йиғин ўтказган ”оқ бўрилар” Иорданияга қарши майдонга тушди ва 0:0 ҳисобида дуранг ўйнади.

Ўзбекистон терма жамоасида 2 та йўқотиш бор. Туркия чемпионатида ўйнайдиган легионерлар Азизбек Турғунбоев ва Ҳусниддин Алиқулов мартдаги йиғинни жароҳат сабаб ўтказиб юборади.

Қирғизистон

Қирғизистон терма жамоасининг ЖЧга чиқиш имконияти пастроқ баҳоланмоқда. “Оқ лочинлар” 6 учрашувдан кейин 3 очко тўплашни уддалади. Улар ягона ғалабасини ўз майдонида Шимолий Корея устидан қўлга киритган. Қолган барча баҳсларда имкониятни бой берган. Қирғизлар ўтган баҳсларда 6 марта гол уришни уддалаган бўлса, 13 бора ўз дарвозасидан тўп ўтказиб юборган.

Жамоа охирги учрашувни 2024 йилда Эронга қарши ўтказган ва 2:3 ҳисобида имкониятни бой берган.

Ўзаро учрашувлар тарихи

Ўзбекистон ва Қирғизистон ҳозиргача 8 марта тўқнаш келган ва барчасида “оқ бўрилар” ғалаба қозонган. Ушбу баҳсларда энг йирик ҳисоб 2007 йилда қайд этилган, унда Ўзбекистон 6:0 ҳисобида ғалаба қозонган. Жамолар ўртасидаги охирги баҳс 2024 йилнинг 9 сентябрь куни ўтказилган ва унда ўзбекистонликлар 3:2 ҳисобида рақибидан устун келган.

Барча учрашувларда қайд этилган натижалар:

1. Қирғизистон — Ўзбекистон 0:6
2. Ўзбекистон — Қирғизистон 4:0
3. Қирғизистон — Ўзбекистон 0:3
4. Ўзбекистон — Қирғизистон 5:0
5. Ўзбекистон — Қирғизистон 3:1
6. Ўзбекистон — Қирғизистон 3:1
7. Қирғизистон — Ўзбекистон 1:4
8. Қирғизистон — Ўзбекистон 2:3

Тўплар нисбати ҳам Ўзбекистон томонда — жамоа 8 учрашувда 31 марта қирғизлар дарвозасини ишғол қилган, 5 марта ўз дарвозасидан гол ўтказиб юборган.

Transfermarkt маълумотларига кўра, Ўзбекистон терма жамоасининг умумий қиймати 70 миллион еврони ташкил қилади. Кападзе шогирдлари сафида ҳаракат қиладиган энг қиммат футболчи — “Манчестер Сити” аъзоси Абдуқодир Ҳусанов ҳисобланади. Унинг Transfermarkt нашридаги қиймати 35 миллион евро этиб белгиланган. Кейинги ўриндан “ЦСКА” аъзоси Аббосбек Файзуллаев жой олган. Футболчининг нархи 8 миллион еврога баҳоланган. Ўзбекистон терма жамоасининг энг қиммат учинчи футболчиси эса Элдор Шомуродов ҳисобланади. “Рома” клуби ҳужумчисининг ҳозирги кундаги нархи 4 миллион еврони ташкил қилади.

Ўзбекистон терма жамоасининг энг қиммат 10 футболчиси:

1. Абдуқодир Ҳусанов — 35 миллион евро;
2. Аббосбек Файзуллаев — 8 миллион евро;
3. Элдор Шомуродов — 4 миллион евро;
4. Остон Ўрунов — 2,5 миллион евро;
5. Отабек Шукуров — 1,8 миллион евро;
6. Жалолиддин Машарипов — 1,8 миллион евро;
7. Ҳусниддин Алиқулов — 1,7 миллион евро;
8. Абдувоҳид Неъматов — 1,5 миллион евро;
9. Акмал Мозговой — 1,3 миллион евро;
10. Шерзод Насруллаев — 1,3 миллион евро.

Ўзбекистон Осиёдаги учинчи энг қиммат терма жамоа ҳисобланади. Улардан олдинги ўринларда Япония (307 миллион евро) ва Жанубий Корея (121,10 миллион евро) жой олган. Ўзбекистон FIFA рейтингида 58-ўринда эгаллаб турибди.

Қирғизистон терма жамоасининг умумий нархи 7,5 миллион евро ҳисобланади. “Оқ Лочинлар”нинг энг қиммат футболчиси — Гулжигит Алиқулов. Москванинг “Торпедо” клубида ҳаракат қиладиган футболчинг Transfermarkt нашридаги нархи 800 минг еврога баҳоланган. Самарқанднинг “Динамо” клуби собиқ футболчиси, ҳозирги кунда Эроннинг “Истиқлол” жамоасида ўйнаётган Жоэл Кожо қирғизистонликларнинг иккинчи энг қиммат футболчиси бўлиб турибди. Унинг нархи Transfermarkt порталида 700 минг евро этиб кўрсатилган. Индонезянинг “Персита” жамоасида ўйнайдиган Тамирлан Козубаев эса кучли учликка якун ясаган. Унинг трансфер нархи 500 минг евро ҳисобланади.

Қирғизистон терма жамоасининг энг қиммат 10 футболчиси:

1. Гулжигит Алиқулов — 800 минг евро
2. Жоэл Кожо — 700 мимг евро
3. Тамирлан Козубаев — 500 минг евро
4. Элдиёр Зарипбеков — 450 минг евро
5. Кристиан Браузман — 450 минг евро
6. Алимардон Шукуров — 450 минг евро
7. Кайрат-Жиргалбек — 350 минг евро
8. Валерий Кичин — 350 минг евро
9. Эржон Токотаев — 300 минг евро
10. Эрбол Атабоев 275 минг евро

Қирғизистон терма жамоаси Осиёдаги энг қиммат 20-терма жамоа ҳисобланади. FIFA рейтингида 107-поғонадан жой олган.

Маълумот учун, Ўзбекистон — Қирғизистон терма жамоалари ўртасидаги баҳс 20 март, соат 21:00 да бошланади. Учрашув Тошкентдаги “Бунёдкор” стадионида бўлиб ўтади.