Тошкентда автобус ҳайдовчиси йўловчиларни тушириб юборгани айтилган хабарлар тарқалди. “Тошшаҳартрансхизмат” ҳолатга изоҳ берди.
Маълум қилинишича, ушбу ҳолат 2-Автобус саройи филиалига бириктирилган, Yutong русумли 72-сонли автобус ҳайдовчиси Ш.Ш билан содир бўлган. Бунда ҳайдовчи автобусни Авиасозлар автошоҳбекатидан Жомий майдони томонга бошқариб бораётган вақтда, “Авиасозлар деҳқон бозори” оралиқ бекатида автобуснинг ҳарорат сигнали ишлаб кетган.
Ҳайдовчи йўловчиларга совитиш тизимидаги сувнинг ҳарорати кескин ошиши натижасида автобусда юзага келган муаммо сабабини тушунтириб, йўловчилардан автобусни тарк этиб, ортидан келаётган автобусни кутишларини таклиф қилган.
Шунингдек, ҳайдовчи йўл ҳақини тўлаган йўловчилар кейинги автобусда тўламаслигини ва бу ҳақида кейинги автобус ҳайдовчисини шахсан огоҳлантирганини маълум қилган.
Шунга қарамай, нақд пулга чек орқали тўлов қилган айрим йўловчилар ҳайдовчидан пулни нақд кўринишида қайтаришини талаб қилган. Ҳайдовчи эса йўловчиларга яна бир бор кейинги автобусда тўлов қилмасликлари ва кейинги автобуснинг ҳайдовчиси огоҳлантирилганлиги ҳақида маълумот берган.
Шундан сўнг ҳайдовчи автобусни 2-Автобус саройи филиалига олиб бориб, техник текширувдан ўтиш учун йўлланма олган ҳолда “Тошавтотаъмирхизмат” УКга етказган. Ҳозирда автобуснинг техник носозлигини бартараф этиш ишлари олиб борилаётган бўлиб, носозлик тўлиқ бартараф этилганидан сўнг автобус йўналишда хизмат кўрсатиш учун чиқарилиши айтилди.
Маълумот ўрнида, жамият таркибига киритилган автобус саройлари тасарруфидаги автобусларнинг фаолияти доимий равишда онлайн кузатиб борилади. Уларнинг ҳар бир ҳаракати қатъий назоратга олинган. Автобус фаолияти давомида бирон-бир қоидабузарликка йўл қўйган ҳолатлари аниқланган тақдирда, ҳайдовчига нисбатан тегишли чоралар кўрилаётгани айтилди.
Изоҳ (0)