Хитой жануби-ғарбидаги Шигатзе шаҳри Динжи уездида кучли зилзила оқибатида кўплаб одамлар ҳаётдан кўз юмгани ва жароҳат олгани муносабати билан президент Шавкат Мирзиёев Хитой Халқ Республикаси раиси Си Цзиньпинга таъзия йўллади. Бу ҳақда Президент матбуот хизмати хабар берди.
Давлат раҳбари ҳалок бўлганларнинг оила аъзолари ва яқинларига ҳамдардлик билдирди, жабрланганлар тез орада шифо топишини тилади.
Аввалроқ Хитой таркибидаги Тибет автоном ҳудудида кучли зилзила қайд этилгани ҳақида хабар берилганди. Силкинишлар юзлаб километр узоқликдаги Непалда ҳам сезилган. Хитой зилзила тармоқлари маркази маҳаллий вақт билан соат 09:05 да 10 км чуқурликда 6,8 балли зилзилани қайд этган. АҚШ Геология хизмати эса зилзила кучини 7,1 магнитуда деб баҳолаган.
Ҳодиса оқибатида 32 киши ҳалок бўлгани айтилмоқда. Қурбонлар сони ортиши мумкин. 6,8 магнитудали зилзила кучли ҳисобланади ва жиддий зарар етказиши мумкин.
Изоҳ (0)