Америкалик миллиардер Илон Маскнинг қўшнилари ундан қонунга хилоф тарзда қурилган баланд панжарани бузиб ташлашни талаб қилди. Бу ҳақда The New York Times хабар берди.
Маълум қилинишича, тадбиркор Техаснинг нуфузли Остин районидан уй сотиб олган. Аввалига қўшнилар 6 миллион долларлик уйнинг янги эгаси ким бўлганини ҳатто тахмин ҳам қилмаган. Чунки узоқ вақт давомида участкада фақат хизмат кўрсатувчи ходимлар ва қурувчилар бўлган. Қурувчилар беш метрли панжара ва баланд пўлат дарвоза ўрнатган.
Муаммо шундаки, Илон Маск аввал қурилиш ишларини бошлаб юборади, рухсатномани эса кейин, яъни орқадан олишга ҳаракат қилади. Айнан шундай ҳолат юқорида тилга олинган панжара билан ҳам юз берди. Маҳаллий қоидаларга кўра, Остинда баландлиги икки метрдан ортиқ бўлган панжара қуриш тақиқланган. Ҳатто дунёдаги энг бой одам ва АҚШ президенти дўсти бўлсанг ҳам, дейилади хабарда.
Маск ўз панжарасини “қонунийлаштириш”га уринганида, маҳаллий ҳокимият унга истисно ҳолат сифатида рухсат беришдан бош тортган. Чунки бу ҳолат бошқа миллиардерлар учун ҳам қоидаларга амал қилмасликка баҳона бўлиши мумкин.
Бундан ташқари, Маск ўз мулки ҳақидаги маълумотлар оммавий реестрларда (давлат кўчмас мулк базаларида) пайдо бўлмаслиги кераклигини шаҳар маъмуриятига уқтиришга уринган. У буни ўзининг гўёки федерал давлат хизматчиси мақоми билан асослашга ҳаракат қилган ва зарур ҳужжатларни ҳокимият талаб қилса, тақдим этишга ваъда берган.
Яқин кунларда Остин шаҳар кенгаши йиғилиши бўлиб ўтади. Унда ноқонуний панжара ва унинг эгаси бўйича қандай чоралар кўрилиши муҳокама қилинади.
Изоҳ (0)