Amerikalik milliarder Ilon Maskning qo‘shnilari undan qonunga xilof tarzda qurilgan baland panjarani buzib tashlashni talab qildi. Bu haqda The New York Times xabar berdi.
Ma’lum qilinishicha, tadbirkor Texasning nufuzli Ostin rayonidan uy sotib olgan. Avvaliga qo‘shnilar 6 million dollarlik uyning yangi egasi kim bo‘lganini hatto taxmin ham qilmagan. Chunki uzoq vaqt davomida uchastkada faqat xizmat ko‘rsatuvchi xodimlar va quruvchilar bo‘lgan. Quruvchilar besh metrli panjara va baland po‘lat darvoza o‘rnatgan.
Muammo shundaki, Ilon Mask avval qurilish ishlarini boshlab yuboradi, ruxsatnomani esa keyin, ya’ni orqadan olishga harakat qiladi. Aynan shunday holat yuqorida tilga olingan panjara bilan ham yuz berdi. Mahalliy qoidalarga ko‘ra, Ostinda balandligi ikki metrdan ortiq bo‘lgan panjara qurish taqiqlangan. Hatto dunyodagi eng boy odam va AQSH prezidenti do‘sti bo‘lsang ham, deyiladi xabarda.
Mask o‘z panjarasini “qonuniylashtirish”ga uringanida, mahalliy hokimiyat unga istisno holat sifatida ruxsat berishdan bosh tortgan. Chunki bu holat boshqa milliarderlar uchun ham qoidalarga amal qilmaslikka bahona bo‘lishi mumkin.
Bundan tashqari, Mask o‘z mulki haqidagi ma’lumotlar ommaviy reyestrlarda (davlat ko‘chmas mulk bazalarida) paydo bo‘lmasligi kerakligini shahar ma’muriyatiga uqtirishga uringan. U buni o‘zining go‘yoki federal davlat xizmatchisi maqomi bilan asoslashga harakat qilgan va zarur hujjatlarni hokimiyat talab qilsa, taqdim etishga va’da bergan.
Yaqin kunlarda Ostin shahar kengashi yig‘ilishi bo‘lib o‘tadi. Unda noqonuniy panjara va uning egasi bo‘yicha qanday choralar ko‘rilishi muhokama qilinadi.
Izoh (0)