Гўзаллик танлови ғолибаси ва машҳур инфлюенсер Нгуен Тҳук Тҳуй Тен истеъмолчиларга нотўғри маълумот берганликда айбланиб, Ветнам ҳукумати томонидан ҳибсга олинди. Бу ҳақда BBC нашри хабар берди.
У ўсимлик толаларига бой, деб реклама қилган чайналадиган конфет кўринишидаги биологик фаол қўшимча ҳақидаги хабарлар сохта бўлиб чиқди.
Нгуен Тҳук Тҳуй Тен ўзининг ижтимоий тармоқлардаги саҳифаларида таркибида ўсимлик толалари мавжуд, деб айтилган пастилка (таблетка)ларни фаол реклама қилиб келган. “Kera Supergreens номли БФҚ Фам Куанг Лин ва Ханг Зу Мук каби инфлюенсерлар томонидан ҳам тарғиб қилган. Терговда маълум бўлишича, мазкур маҳсулот Нгуен ва унинг икки шериги асос солган компания маҳсулотларидан биридир.
Улар ҳар бир дона препарат бир нечта сабзавотлар истеъмолига тенг миқдорда ўсимлик толасини ўз ичига олишини даъво қилишган. Ўтказилган лаборатория таҳлиллари бундай даъволарнинг ҳақиқатдан йироқ экани исботлангач, жамоатчилик орасида норозилик юзага келди.
Фуқаролардан бири маҳсулотни лаборатория таҳлилига юборгач, ҳар бир пастилка аслида атиги 16 мг толани ўз ичига олгани, рекламада эса 200 мг деб кўрсатилгани маълум бўлди. Уларни ишлаб чиқаришда сифатсиз ингредиентлар қўллангани ҳам аниқланди.
Бундан ташқари, маҳсулот қадоқларида толалар миқдори ҳақида маълумот бўлмагани ҳамда таркибида диареяга сабаб бўладиган сорбит моддаси жуда кўп бўлса-да, бу ҳақида ҳеч қандай эслатма йўқлиги қайд этилган.
Март ойида учала инфлюенсер жаримага тортилиб, жамоатчиликдан кечирим сўрашган. Можаро юзага келишидан олдин ушбу препаратларнинг 100 мингдан ортиқ қутиси сотилган.
Маълумот учун, Нгуен Тҳук Тҳуй Тен 2021 йилда Бангкокда бўлиб ўтган Miss Grand International гўзаллик танловида ғалаба қозонганидан сўнг, Вьетнамда машҳурликка эришган, кўплаб маҳаллий брендлар уни рекламаларга жалб қилган. Модель бир нечта реалити-шоуларда ҳам иштирок этган. Шунингдек, Вьетнам бош вазири ва маҳаллий ҳукумат томонидан бир неча марта тақдирланган.
Изоҳ (0)