Қашқадарё вилояти Қамаши туманидаги хусусий боғчада 2 ёшли қизча назоратсиз қолгани сабаб ариққа тушиб кетиб, ҳалок бўлди.
Маълум қилинишича, воқеа вилоятнинг Қамаши туманидаги хусусий боғчада 20 май куни содир бўлган. Марҳуманинг онаси боғча очилган вақтда ариқ борлиги сабабли хавфли эканини ота-оналар айтгани, лекин боғча маъмурияти хавфсизлик чораси кўрилишини айтганини таъкидлаган.
20 май куни қизимни ҳар доимгидек боғчага кузатдим. Қайноғам келиб қизингни мазаси бўлмабди, деб мени олиб борди. Борсам қизимнинг жони узилганди, ерда ётган эди. Баданлари муздек. Дарахт тагида боламни ўраб қўйишган экан.
Ман ишониб уларга боламни топширдим, нега ундай эътиборсизлик қилишади. 3 кун бўлди боғча яна ишлаяпти. Улар қатъиян жавобгарликка тортилишини сўрайман", дейди қизчанинг онаси.
Боғча ходимаси берган кўрсатмасида болаларнинг ярми ухлатиш учун хонага олиб кирилгани, қолгани эса ҳовлида қолгани айтилган. Улардан бири бўлган марҳума қизалоқ назоратсиз қолгани сабабли кўчага чиқиб, боғча атрофидаги ариққа тушиб кетиб, ҳалок бўлган.
2024 йилнинг 15 февралида Жиззах вилояти Дўстлик туманида жойлашган оилавий нодавлат мактабгача таълим ташкилоти тарбияланувчилари назоратсиз қолдирилиши оқибатида, уч нафар бола мактабгача таълим ташкилоти ҳовлисидан чиқиб кетганди. Шу куни соат 2021 йилда туғилган қизча нодавлат мактабгача таълим ташкилотидан тахминан 1 километр узоқликдаги фермер хўжалиги дала майдонидан оқиб ўтувчи ариқдаги сув ичидан вафот этган ҳолда топилган ва ҳолат юзасидан жиноят иши қўзғатилганди.
Жиноят ишида жами уч киши — 31 ёшли боғча директори Ф.М., 31 ёшли тарбиячи Д.Т. ва 49 ёшли туман Санитария-эпидемиологик осойишталик ва жамоат саломатлиги бошқармаси бошлиғи А.Ў. айбланган.
Суд ҳукмига кўра:
Директор Ф.М. Жиноят кодексининг 116-моддаси 3-қисми (касб юзасидан ўз вазифаларини лозим даражада бажармаслик одам ўлимига сабаб бўлса) ва 167-моддаси 2-қисми “г” бандида (мансаб мавқейини суиистеъмол қилиш йўли билан ўзлаштириш ёки растрата йўли билан талон-торож қилиш) назарда тутилган жиноятларни содир этганликда айбдор деб топилиб, 3 йилга мактабгача ва мактаб таълими соҳасида ишлаш ҳуқуқидан маҳрум этиш ва 4 йил 1 ойга озодликни чеклаш жазоси тайинланди;
Тарбиячи Д.Т. Жиноят кодексининг 116-моддаси 3-қисмида назарда тутилган жиноятларни содир этганликда айбдор деб топилиб, унга 3 йилга мактабгача ва мактаб таълими соҳасида ишлаш ҳуқуқидан маҳрум этиш ва 4 йилга озодликни чеклаш жазоси тайинланди;
Бошқарма бошлиғи А.Ў. Жиноят кодексининг 205-моддаси 1-қисми (ҳокимият ёки мансаб ваколатини суиистеъмол қилиш) ва 209-моддаси 1-қисмида (мансаб сохтакорлиги) назарда тутилган жиноятларни содир этганликда айбдор деб топилди. Унга 1 йилга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиш ва 1 йил 6 ойга озодликни чеклаш жазоси тайинланди.
Бундан бир неча йил аввал Қаршида боғчадан берухсат чиқиб кетган 4 ёшли болани поезд уриб кетганди. Фарғонада эса боғчадан ташқарига рухсатсиз чиққан 4 ёшли бола чўкиб кетиб, вафот этганди.
Изоҳ (0)