Ўзбекистонда маркировкалаш қоидаларини бузганлик учун 2026 йилдан жарималар жорий этилади. Бу ҳақда “Мажбурий рақамли маркировкалаш тизими самарадорлигини оширишга қаратилган қўшимча чора-тадбирлар тўғрисида”ги президент қарорида белгиланди.
Ҳужжатдан асосий мақсад — маркировкаланган маҳсулотларнинг ҳаракат занжирини тўлиқ кузатиб бориш орқали яширин ишлаб чиқариш ва контрафакт маҳсулотлар муомаласига чек қўйиш. Тадбиркорлик субъектларига қўшимча имконият яратиш.
Унга кўра, тадбиркорлар томонидан олинган маркировка кодларини маҳсулотларга қўллаш учун белгиланган 90 кунлик муддат бекор қилинади. Бунда фойдаланилмасдан турган маркировка кодлари учун амалга оширилган тўловлар янги кодларни сотиб олишда ҳисобга олинади.
Маркировка кодлари маҳсулотга бевосита қўллангандан кейин улар учун тўлов амалга оширилади. CRPT Турон маркировкалаш тизими оператори маҳсулотларни агрегациялашда қўлланадиган кодларни бепул тақдим этади. Тадбиркорлик субъектлари мурожаатларини тезкор ҳал қилиш учун тун-у кун ишловчи Call-марказ йўлга қўйилади.
2025 йилнинг 1 июлидан рақамли маркировкаланган маҳсулотларни улгуржи сотиш фақат нақд пулсиз шаклда банк ҳисобварақлари орқали амалга оширилади.
Рақамли маркировка қоидаларига риоя қилинишини назорат қилиш бўйича ҳудудлараро солиқ инспекцияси ташкил этилади. Инспекция маркировкаланган маҳсулотлар айланмасининг барча босқичларида тизимли назоратни таъминлаши керак.
Чакана сотишда маркировка коди киритилгандан сўнг онлайн назорат-касса техникасининг касса чеки шакллантирилади. Бунда олдин фойдаланилган маркировка кодлари мустасно.
2026 йил 1 январдан мажбурий рақамли маркировкалаш қоидаларини бузиш ҳолатлари бўйича масофавий солиқ текширувини ўтказиш йўлга қўйилади. Бунда ҳуқуқбузарликлар солиқ органларининг ахборот тизими орқали аниқланади. Текширув учун махсус гувоҳнома талаб этилмайди ҳамда қоидабузарликлар аниқланса, бартараф этиш бўйича огоҳлантириш берилади. Иккинчи марта огоҳлантириш берилгандан сўнг қоидабузарлик яна содир этилганда эса, реализация амалга оширилган охирги ҳисобот чорагида олинган тушумнинг маълум фоизи миқдорида жарима қўлланилади.
Жарима миқдори қуйидагича бўлади:
- бир ой давомида биринчи марта — соф тушумнинг 0,2 фоизи;
- бир йил ичида иккинчи марта — соф тушумнинг 0,4 фоизи;
- бир йил ичида учинчи марта — соф тушумнинг 1 фоизи;
- бир йил ичида тўртинчи марта ва ундан кейинги ҳолатлар — соф тушумнинг 2 фоизи.
Жарима қўлланилган тадбиркорларга 1 йил давомида ҚҚС суммасининг ўрни қопланмайди.
Изоҳ (0)