Ўзбекистонда ДХШ лойиҳаларини ишлаб чиқиш жамғармаси ташкил этилди. Президент қарори билан Иқтисодиёт ва молия вазирлигининг бу борадаги таклифлари маъқулланди.
Қайд этилишича, вазирликнинг Ўзбекистонда давлат-хусусий шериклик лойиҳаларини ишлаб чиқиш жамғармасини ташкил этиш ва унинг асосий вазифалари сифатида энергетика, коммунал хўжалик, транспорт, экология, соғлиқни сақлаш, таълим ва бошқа устувор соҳаларда давлат-хусусий шериклик лойиҳалари ҳужжатларини сифатли ишлаб чиқишни белгилашга оид таклифлари маъқулланди.
Шунингдек:
- давлат-хусусий шериклик лойиҳаларидан келиб чиқувчи давлатнинг тўғридан тўғри ва шартли мажбуриятларини мониторинг қилиш, бошқариш ва тартибга солиш тизимини амалиётга татбиқ этиш;
- давлат бюджети лойиҳасини шакллантириш ва ижроси бўйича ҳисоботларда бюджет харажатларининг барқарор ривожланиш миллий мақсадларига мувофиқлиги ва иқлим ўзгаришига таъсирини кўрсатиб бориш (маркировкалаш) механизмлари жорий этилади.
Иқтисодиёт ва молия вазирлиги икки ҳафта муддатда:
- халқаро молия институтларини жалб қилган ҳолда Ўзбекистонда давлат-хусусий шериклик лойиҳаларини ишлаб чиқиш жамғармаси фаолиятини самарали ташкил этиш бўйича президент қарори лойиҳаси;
- давлат-хусусий шериклик лойиҳаларидан юзага келиши мумкин бўлган давлатнинг мажбуриятларини бошқариш ва тартибга солиш механизмларини белгиловчи ҳукумат қарори лойиҳаси;
- 2024 йил 1 январга қадар давлат бюджети харажатларининг барқарор ривожланиш миллий мақсадларига мувофиқлиги ва иқлим ўзгаришига таъсирини кўрсатиб бориш (маркировкалаш) механизмларини жорий этиш бўйича ҳукумат қарори лойиҳаси киритилишини таъминлайди.
Изоҳ (0)