Ўзбекистон Солиқ кодексининг 227 прим 1-моддасида кўзда тутилган жарима миқдори соф тушумнинг 100 фоизидан 2 фоизига камайтирилади. Бу ҳақда 13 февраль куни Тошкент шаҳрида ўтказилган тадбиркорлар билан учрашувда Савдо-саноат палатаси раиси Даврон Ваҳобов маълум қилди, дея хабар бермоқда “Дарё” мухбири.
Даврон Ваҳобовнинг айтишича, кўплаб тадбиркорларни қийнаб келган баҳсли моддага ўзгартириш киритилмоқда.
“227 прим 1-модда бўйича муаммо бош вазир бошчилигида, иқтисодий комплекс томонидан тўлиқ ўз ечимини топди, деб айта оламан. 1–2 кунда яхши хабар бўлади. Қисқача эълон қилмоқчиманки, 227 прим 1-моддада жарималар масаласи бор эди. Бу ерда ўтирган маълум тадбиркорлар у жаримага тушган. Энди 100 фоизлик жарима миқдори 2 фоизга туширилади. Яъни 100 фоиз жарима тўлаганларга пулининг 98 фоизи қайтариб берилади. Келажакда фақат 2 фоиз жарима бўлади”, — деди Савдо-саноат палатаси раиси.
Эслатиб ўтамиз, ҳозирда амалдаги 227 прим 1-моддага кўра, фискал белгиларни акс эттириш ёхуд автоматлаштирилган ҳисобга олиш ўлчов воситалари билан жиҳозлаш ёки солиқ органларининг ахборот тизимлари билан интеграция қилинишини таъминлаш бўйича қонунчиликда белгиланган талабларни ёки тартибни бузиш, шунингдек, товарларни (маҳсулотларни) ишлаб чиқарувчилар, импорт қилувчилар ва сотувчилар томонидан идентификация воситалари орқали мажбурий рақамли маркировкалаш қоидаларини бузиш — реализация амалга оширилган охирги ҳисобот чорагида олинган соф тушум миқдорида жарима солишга сабаб бўлади.
Изоҳ (0)