Ўзбекистонда фискал ҳуқуқбузарликлар содир этганлик учун қўлланиладиган молиявий санкциялар миқдори камайтирилди. Бу борадаги тегишли қонун билан Солиқ кодексига ўзгартириш киритилди, деб хабар беради Telegram’даги “Ҳуқуқий ахборот” канали.
Унга кўра, фискал белгиларни акс эттириш ёхуд автоматлаштирилган ҳисобга олиш ўлчов воситалари билан жиҳозлаш ёки солиқ органларининг ахборот тизимлари билан интеграция қилинишини таъминлаш бўйича қонунчиликда белгиланган талабларни ёки тартибни бузиш, шунингдек, товарларни (маҳсулотларни) ишлаб чиқарувчилар, импорт қилувчилар ва сотувчилар томонидан идентификация воситалари орқали мажбурий рақамли маркировкалаш қоидаларини бузиш:
- реализация амалга оширилган охирги ҳисобот чорагида олинган соф тушумнинг 2 фоизи миқдорида жарима солишга сабаб бўлиши белгиланди.
Илгари реализация амалга оширилган охирги ҳисобот чорагида олинган соф тушум миқдорида жарима солишга сабаб бўлган.
Шунингдек, худди шундай ҳуқуқбузарлик жарима қўлланилганидан кейин бир йил давомида такроран содир этилган бўлса:
- реализация амалга оширилган охирги ҳисобот чорагида олинган соф тушумнинг 20 фоизи миқдорида жарима солишга сабаб бўлиши белгиланди.
Илгари бу қоида мавжуд эмасди. Қонун расмий эълон қилинган кундан эътиборан кучга киради.
Эслатиб ўтамиз, февраль ўрталарида Тошкент шаҳрида ўтказилган тадбиркорлар билан учрашувда Савдо-саноат палатаси раиси Даврон Ваҳобов Солиқ кодексининг 227 прим 1-моддасида кўзда тутилган жарима миқдори соф тушумнинг 100 фоизидан 2 фоизига камайтирилишини маълум қилганди. Май ўрталарида Сенатнинг эллик иккинчи ялпи мажлисида “Ўзбекистон Республикаси Солиқ кодексининг 227-1-моддасига ўзгартириш киритиш тўғрисида”ги қонун кўриб чиқилиб, сенаторлар томонидан маъқулланган эди.
Изоҳ (0)