Ўзбекистонда сув ва алкоголсиз ичимликларни мажбурий рақамли маркировкалаш жорий этилади. Бу ҳақда CRPT TURON миллий оператори матбуот хизмати хабар берди.
Қайд этилишича, 2023 йил 1 июлдан бошлаб газланган ёки газсиз сув, ичимликлар, шунингдек, ферментланмаган ширин мева ва сабзавот шарбатлари учун маркировкалаш мажбурий бўлади, узум шарбати бундан мустасно.
Металл идишлардаги сув ва алкоголсиз ичимликлар учун Data Matrix кодларини мажбурий қўллаш 2024 йил августидан жорий этилади.
Рақамли маркировкалаш — бу маҳсулот ҳақидаги маълумотларни электрон базада сақлайдиган товарларни қадоқлаш учун махсус Data Matrix кодини қўллашдир. Натижада ҳар бир киши товар сифатини текшириш ва кузатиш имкониятига эга бўлади. Шу мақсадда истеъмолчиларга сифатсиз маҳсулотлар ҳақида хабар бериш ва керакли маълумотларни олиш имконини берувчи “Асл Белгиси” мобил дастури яратилган.
Бундан ташқари, дастур ёрдамида тадбиркорлар товарларнинг маркировкаланишини текширишлари ҳамда ноқонуний муомалада бўлган алкогол ва тамаки маҳсулотлари билан ишлашнинг олдини олишлари мумкин бўлади.
Март охирларида Ўзбекистонга импорт қилинадиган озиқ-овқат маҳсулотларини давлат тилида мажбурий маркировка қилишни тўхтатиш муддати яна узайтирилганди. 2022 йил июнда қабул қилинган “Истеъмол бозорларида нархлар барқарорлигини таъминлашга ва монополияга қарши чораларнинг таъсирчанлигини оширишга доир қўшимча чора-тадбирлар тўғрисида”ги президент фармони билан Ўзбекистонга олиб кириладиган озиқ-овқат маҳсулотларини давлат тилида мажбурий маркировка қилиш тартиби 2023 йил 1 январгача тўхтатилган эди.
Изоҳ (0)