Тошкент шаҳрининг Миробод туманида жойлашган Тарас Шевченко кўчасидаги гастрономик аллеяни барпо этиш бўйича ишларнинг биринчи босқичини якунлаш муддати 10 октябрга кўчирилди. Бу ҳақда туман ҳокимлиги матбуот хизмати хабар берди.
Маълум қилинишича, бугунги кунда мазкур лойиҳанинг биринчи босқичини амалга ошириш бўйича ишлар кўлами якуний босқичга ўтган.
Гастрономик кўча бўйлаб 6 та фото-зона барпо этилган, 39 та кичик ва 17 та катта торшерлар ўрнатилган, 1 та автобус бекати қурилган, 39 та видеокузатув камералари ва юзни таниш тизимлари, 20 та ўриндиқ ва ахлат қутилари ўрнатилган ҳамда WI-FI тарқатиш тизимлари монтаж қилинган.
“Шунингдек, пойтахтимиз аҳолиси ва меҳмонларига қулайлик яратиш мақсадида қарийб 3000 кв/м пиёдалар йўли барпо этилди, қатнов йўлининг асосий қисми (2600 кв.м) эса табиий гранит тошдан терилди”, дейилади хабарда.
Ҳудудни ободонлаштириш ишларини даставвал сентябрь ойида якунлаш режалаштирилган эди.
Туман ҳокимлигига кўра, ободонлаштириш ишлари давомида йўлнинг асфалт қопламасини табиий гранит тошга алмаштириш қарори қабул қилингани туфайли лойиҳанинг биринчи босқичини якунлаш муддати октябрь ойининг бошига кўчирилди.
“Айни пайтда ҳудудда кўкаламзорлаштириш, яъни яшил зоналарни барпо этиш бўйича ишлар жадал давом этмоқда – аллея бўйлаб 30 тупга яқин манзарали дарахт кўчатлари экилмоқда.
Шу муносабат билан Тарас Шевченко кўчасидаги гастрономик аллеяни барпо этиш бўйича биринчи босқич ишлари 10-октябрь санасида якунланишини ва шу санадан иккинчи босқич ишларига старт берилишини маълум қиламиз”, дея қўшимча қилинади хабарда.
Маълумот учун, ушбу кўчада жойлашган тадбиркорлик субъектлари 24 соатлик иш режимига фаолият юритади ва йўлнинг ўзи кечки соат 20:00 дан тонгги 06:00 гача автомобиллар учун ёпилади ва пиёдалар ҳудудига айланади.
2024 йилнинг 27 февраль куни Президент бошчилигида Тошкент шаҳрида саноат, инфратузилма ва туризмни ривожлантириш масалалари муҳокама қилиниб, пойтахт ҳудудида “гастрономик кўча”лар ташкил этиш таклифи илгари сурилган эди. Шундан сўнг Миробод тумани Тарас Шевченко кўчаси гастрономик кўчага айлантирилиши ҳақида хабарлар эълон қилинди.
22 июль куни Миробод тумани ҳокимлиги Telegram каналида мазкур кўчанинг бир қисми барча турдаги транспорт ҳаракати учун ёпилгани билдирилиб, қурилиш ва таъмирлаш ишлари бошланди.
5 августга келиб бунёдкорлик ишлари давомида ёритиш устунлари, ўриндиқлар ва чиқинди урналари, декоратив дарахт кўчатларини ўтқазиш, суғориш тизимлари, аудио мусиқа тизимини ташкил этиш, декоратив арка ва устунлар, фотозоналар учун декоратив элементлар ўрнатиш, пиёдалар йўлаклари, велойўлаклар ва замонавий ўриндиқлар ташкил этиш, болалар ўйингоҳи ва кўргазмали саҳна ўрнатиш каби ишларни амалга ошириш режалаштирилгани ёзилди.
“Дарё” фотомухбири сентябрнинг илк кунларида ушбу кўчада бўлиб, ишларнинг боришини кадрларга муҳрлаган эди.
Изоҳ (0)