Фарғона вилояти ҳокими Хайрулло Бозоров Туркиядаги World Tourism Forum Institute халқаро туризм ташкилоти раҳбари Булут Бағжи ҳамда туризм соҳасида фаолият кўрсатувчи ишбилармон Муаттар Эрген билан учрашди. Бу ҳақда вилоят ҳокимлиги матбуот хизмати хабар берди.
Учрашувда Фарғона вилоятида туризмни янада ривожлантириш, вилоят имижини халқаро миқёсда танитиш, туризм инфратузилмаси соҳасига хорижий инвесторларни жалб этиш масалалари муҳокама қилинди.
Музокаралар натижасида Фарғонада 2024 йилнинг октябрь ноябрь ойларида Michelin Guide халқаро ресторанларни баҳолаш тизими томонидан эътироф этилган дунёнинг таниқли ошпазлари ҳамда гастрономик соҳага ихтисослашган блогер-инфлюенсерларни ҳам жалб этган ҳолда “Фарғона гастрономик фестивали”ни ҳамкорликда ташкил этиш келишиб олинган.
Шунингдек, сентябрь ойида халқаро туризм ҳамда сервис компаниялари, авиакомпаниялар раҳбарлари иштирокида Мастер-класс ўтказилади.
Шунингдек, Фарғона вилоятига халқаро меҳмонхона брендларини жалб этиш бўйича ҳам ҳамкорликда иш ташкил этиладиган бўлди.
Изоҳ (0)