Toshkent shahrining Mirobod tumanida joylashgan Taras Shevchenko ko‘chasidagi gastronomik alleyani barpo etish bo‘yicha ishlarning birinchi bosqichini yakunlash muddati 10-oktyabrga ko‘chirildi. Bu haqda tuman hokimligi matbuot xizmati xabar berdi.
Maʼlum qilinishicha, bugungi kunda mazkur loyihaning birinchi bosqichini amalga oshirish bo‘yicha ishlar ko‘lami yakuniy bosqichga o‘tgan.
Gastronomik ko‘cha bo‘ylab 6 ta foto-zona barpo etilgan, 39 ta kichik va 17 ta katta torsherlar o‘rnatilgan, 1 ta avtobus bekati qurilgan, 39 ta videokuzatuv kameralari va yuzni tanish tizimlari, 20 ta o‘rindiq va axlat qutilari o‘rnatilgan hamda WI-Fi tarqatish tizimlari montaj qilingan.
“Shuningdek, poytaxtimiz aholisi va mehmonlariga qulaylik yaratish maqsadida qariyb 3000 kv/m piyodalar yo‘li barpo etildi, qatnov yo‘lining asosiy qismi (2600 kv.m) esa tabiiy granit toshdan terildi”, deyiladi xabarda.
Hududni obodonlashtirish ishlarini dastavval sentyabr oyida yakunlash rejalashtirilgan edi.
Tuman hokimligiga ko‘ra, obodonlashtirish ishlari davomida yo‘lning asfalt qoplamasini tabiiy granit toshga almashtirish qarori qabul qilingani tufayli loyihaning birinchi bosqichini yakunlash muddati oktyabr oyining boshiga ko‘chirildi.
“Ayni paytda hududda ko‘kalamzorlashtirish, yaʼni yashil zonalarni barpo etish bo‘yicha ishlar jadal davom etmoqda – alleya bo‘ylab 30 tupga yaqin manzarali daraxt ko‘chatlari ekilmoqda.
Shu munosabat bilan Taras Shevchenko ko‘chasidagi gastronomik alleyani barpo etish bo‘yicha birinchi bosqich ishlari 10-oktabr sanasida yakunlanishini va shu sanadan ikkinchi bosqich ishlariga start berilishini maʼlum qilamiz”, deya qo‘shimcha qilinadi xabarda.
Maʼlumot uchun, ushbu ko‘chada joylashgan tadbirkorlik subyektlari 24 soatlik ish rejimiga faoliyat yuritadi va yo‘lning o‘zi kechki soat 20:00 dan tonggi 06:00 gacha avtomobillar uchun yopiladi va piyodalar hududiga aylanadi.
2024-yilning 27-fevral kuni Prezident boshchiligida Toshkent shahrida sanoat, infratuzilma va turizmni rivojlantirish masalalari muhokama qilinib, poytaxt hududida “gastronomik ko‘cha”lar tashkil etish taklifi ilgari surilgan edi. Shundan so‘ng Mirobod tumani Taras Shevchenko ko‘chasi gastronomik ko‘chaga aylantirilishi haqida xabarlar e’lon qilindi.
22-iyul kuni Mirobod tumani hokimligi Telegram kanalida mazkur ko‘chaning bir qismi barcha turdagi transport harakati uchun yopilgani bildirilib, qurilish va ta’mirlash ishlari boshlandi.
5-avgustga kelib bunyodkorlik ishlari davomida yoritish ustunlari, o‘rindiqlar va chiqindi urnalari, dekorativ daraxt ko‘chatlarini o‘tqazish, sug‘orish tizimlari, audio musiqa tizimini tashkil etish, dekorativ arka va ustunlar, fotozonalar uchun dekorativ elementlar o‘rnatish, piyodalar yo‘laklari, veloyo‘laklar va zamonaviy o‘rindiqlar tashkil etish, bolalar o‘yingohi va ko‘rgazmali sahna o‘rnatish kabi ishlarni amalga oshirish rejalashtirilgani yozildi.
“Daryo” fotomuxbiri sentyabrning ilk kunlarida ushbu ko‘chada bo‘lib, ishlarning borishini kadrlarga muhrlagan edi.
Izoh (0)