Наманган вилояти суди раиси ўринбосари – фуқаролик ишлари бўйича судлов ҳайъати раиси А.С. Наманган шаҳри, Алишер Навоий кўчаси 49-уйдаги ўзганинг эгалигидаги хонадонни сохта ҳужжатлар билан ўз номига расмийлаштириб, бошқа бир одамга сотиб юборгани маълум бўлмоқда.
Kun.uz мухбири уйнинг ҳақиқий эгаси билан гаплашди. Унинг билдиришича, квартирада доимий ҳеч ким яшамаган. “Бу эҳтиёжимиздан ортиқча бўлган уй эди. Доимий яшамасак-да, йўлимиз тушганида бир кун-ярим кун туриб кетардик. Уста тушириб, таъмирлаётгандик, бошқа одам “документ” кўтариб келди. Шунда билиб қолдик. Ушбу ишга аралашган инсонларнинг ҳаммаси жавобгарликка тортиляпти”, дейди уй эгаси.
Судьялар Олий кенгаши матбуот котиби Турсунали Акбаров А. С. га нисбатан хизмат текшируви ўтказилганини билдириб, текширув хулосаси тегишли қарор қабул қилиш учун Судьялар олий малака ҳайъатига юборилганини маълум қилган.
Хизмат текшируви натижалари Судьялар олий малака ҳайъатига қарор қабул қилиш учун юборилганининг ўзи шикоят важлари тасдиқланганини мантиқан англатади. Дарёнинг шу мазмундаги саволига Кенгаш матбуот котиби “бу ҳақда гапиришга ҳали эрта” деган умумий жавоб билан чекланди.
Бу — Наманган вилояти суди билан боғлиқ биринчи шов-шувли ҳолат эмас. Аввалроқ катта миқдорда электр энергияси ўғирлаган Поп тумани ҳокимининг ўғли қамоқдан озод қилингани, худди шундай жиноятга қўл урган бошқа тадбиркор эса қамоқда қолгани маълум бўлган эди. Шунга қарамай вилоят суди раиси ҳамда судьялари тақдирланган эди.
Изоҳ (0)