Namangan viloyat sudi raisi Alisher Usmanov “Benuqson xizmatlari uchun” ko‘krak nishoni bilan taqdirlandi. Pop tumani hokimining o‘g‘liga nisbatan jazoni o‘zgartirib, uni ozodlikka chiqargan sud majlisida ma’ruzachi bo‘lgan viloyat sudining sudyasi Avazbek Inomovning ota-onasiga esa Sudyalar oliy kengashi tashakkurnomasi e’lon qilindi. Bu haqda Namangan viloyati sudlari rasmiy sahifasida e’lon qilindi.
Avvalroq Daryo.uz saytida katta miqdorda elektr energiyasi o‘g‘irlagan Pop tumani hokimining o‘g‘li qamoqdan ozod qilingani haqida yozgan edi. Shundan so‘ng Kun.uz saytida ushbu jinoyat ishi xuddi shunday jinoyatga qo‘l urgan boshqa tadbirkor qamoqda qolgani, hokimning o‘g‘li esa jazodan deyarli qutilib qolgani haqida maqola e’lon qilingan edi.
Nihoyat, Namangan viloyat sudi rasmiy munosabat bildirdi. Unda hokimning o‘g‘liga ozodlikdan mahrum qilish bo‘lmagan jazo tayinlashda uning aybiga iqrorligi, jinoyat oqibatida yetkazilgan zarar qoplanganidan tashqari Oliy Majlis Senati a’zosi hamda Uychi tumani fermer, dehqon xo‘jaliklari va tomorqa yer egalari kengashi hamda mahalla raisining sudga kiritilgan iltimosnomalari e’tiborga olingani aytiladi.
Xuddi shunday jinoyatda ayblangan boshqa bir tadbirkor tomonidan yetkazilgan zarar qoplangan bo‘lsa-da, biroq miqdori besh barobar ko‘pligi va aybiga iqror bo‘lmagani unga nisbatan ozodlikdan mahrum qilish bilan bog‘liq jazo tayinlanishiga asos sifatida ko‘rsatiladi. Shuningdek, viloyat sudi munosabatida sud ajrimiga nisbatan shikoyat keltirish mumkinligi va belgilangan tartibda ko‘rib chiqilishi, sud hujjatlariga faqat yuqori sud instansiyasi huquqiy baho berish vakolatiga ega ekani ham bildirilgan.
Namangan viloyat sudining ushbu munosabati ijtimoiy tarmoqda navbatdagi muhokamalarga olib keldi. Muhokamalarning aksariyatida “og‘zi qiyshiq bo‘lsa ham boyvachcha gapirsin!” mazmunida istehzo qilinayotgan bo‘lsa, ayrim foydalanuvchilar “har ikki holatda ham zarar qoplanganiga” e’tibor qaratib, “aybiga iqror emasligi og‘irlashtiruvchi holat deb baholanishiga” jiddiy e’tiroz bildiradi. Yana bir munosabatda hokimning o‘g‘liga Oliy Majlis Senati a’zosi hamda Uychi tumani fermer, dehqon xo‘jaliklari va tomorqa yer egalari kengashi iltimosnoma kiritgani, bunday iltimosnoma nima uchun qamoqda o‘tirgan shaxsga nisbatan berilmagani, u ham tadbirkor ekanini qayd etadi.
Sobiq deputat va jamoat faoli Rasul Kusherbayev mazkur jinoyat ishlari bo‘yicha chiqarilgan sud ajrimlariga bildirgan munosabatda “Namangan sudi raisi va sudyalari iste’foga chiqishi va faoliyati tekshirilishi kerak”ligini aytgandi.
Sudyalar oliy kengashi matbuot kotibi Tursunali Akbarov esa “Daryo”ning ushbu masala yuzasidan so‘roviga: “Sudyalar oliy kengashi sud hujjatlariga huquqiy baho berish vakolatiga ega emas. Sud hujjatlariga faqat yuqori sud instansiyasi huquqiy baho berishi mumkin”, deya javob bergan edi.
Izoh (0)