Ўзбекистонда банклардаги давлат улушини 40 фоизга пасайтириш мақсад қилинган. Бу ҳақда Марказий банк раиси ўринбосари Беҳзод Ҳамраев маълум қилди, дея хабар берди “Дарё” мухбири.
Тошкент шаҳрида “Халқаро ҳамкорлик ташаббуслари ҳафталиги” доирасида Ўзбекистондаги макроиқтисодий вазиятга доир сессия ўтказилди. Мулоқот якунида Беҳзод Ҳамраев журналистлар билан банк секторидаги кутилмалар тўғрисида суҳбатлашди. Марказий банк масъулининг айтишича, банклардаги давлат улушини камайтириб бориш режалаштирилган.
“Бу мақсад банк тизимини ривожлантириш дастуримизда белгиланган. Ҳужжатда банклардаги хусусий сектор улуши 60 фоизга етиши, давлатники эса 40 фоизга туширилиши кўзда тутилган. Авваллари банклардаги давлат улуши 80 фоиз бўлган. “Ипотекабанк” сотилгач, бу кўрсаткич 67 фоизга пасайди. Давлат банкларини хусусийлаштириш бўйича ҳукуматнинг аниқ режалари бор. Улар амалга ошса, банклардаги давлат улуши 48 фоизга камаяди. Мақсадимиз бу кўрсаткични 40 фоизгача пасайтиришдан иборат”, деди Марказий банк масъули.
Беҳзод Ҳамраев “Дарё” мухбирининг “банкларда давлат улуши юқори бўлиши самаралими”, деган саволига қисқа жавоб берди.
“Менимча, гап банкнинг қанчалик самарали ишлашида. Масалан, банклардаги давлат улуши 50–60 фоиз бўлса ҳам улар ёмон ишламаслиги мумкин. Агар давлат банклари фақат давлат корхоналарига имтиёз ва кредит берса, рақобатга салбий таъсир кўрсаца, демак самарадорлик паст бўлади”, деди мутахассис.
Шу билан бирга, Марказий банк раиси ўринбосари макроиқтисодий ва инфляцион кутилмаларга тўхталди.
“Ўзбекистонда 2026 йилнинг иккинчи қисмигача инфляцияни 5 фоизга тушириш прогноз қилинмоқда. 2024 йилги мамлакат ялпи ички маҳсулоти 111 миллиард доллар бўлиши кутилмоқда. Бу аҳоли жон бошига 3 минг доллар дегани. Ўтган 9 ойда ЯИМ 6,6 фоизга кўтарилди. Прогнозларга кўра, 2030 йилга бориб ЯИМ 200 миллиард долларга етади. Мазкур рақам жон бошига 5 минг долларга етади” дея таъкидлади Беҳзод Ҳамраев.
Мутахассис инфляцияни таргет даражасида пасайишига тўсиқ бўлувчи хатарлар мавжудлигини ҳам эслатиб ўтди. Жумладан, таклиф томонидан узилишлар бўлиши, бюджет дефицити ортиши, имтиёзли кредитлар ажратишнинг камайиши ва бошқа хатарлар кўзланган мақсадга етишни кечиктириши мумкин.
Изоҳ (0)