Давлат активларини бошқариш агентлиги “Ўзбекнефтегаз” АЖ таркибидаги “Шўртангазкимё мажмуаси” МЧЖ тасарруфидаги болалар боғчаларини хусусийлаштирилиши юзасидан ижтимоий тармоқларда айтилган фикрларга муносабат билдирди.
Аввалроқ “Кун.уз” Қашқадарё вилоятидаги жами 700 ўринли 4 та “Erkatoy” боғчалари “бўш турган обект” сифатида сотувга қўйилиши ҳақида ёзганди. Таҳририятга мурожаат қилган ота-оналарнинг айтишича, бу боғчалар бўш эмас – улар ишлаб турибди.
Қайд этилишича, “Давлат мулкини бошқариш тўғрисида”ги қонун талабларига мувофиқ ҳар йили ўтказиладиган таҳлил ва ялпи хатлов натижалари бўйича хусусийлаштириш дастури ишлаб чиқилади. Жумладан, 2023 йилда ўтказилган таҳлил ва хатлов натижалари бўйича 2024 йилги хусусийлаштириш дастури тасдиқланган ҳамда унда 250 га яқин давлат корхоналари ва уларнинг улушлари, 1 000 дан ортиқ кўчмас мулк объектлари рўйхати тасдиқланган.
Хусусан, “Ўзбекнефтегаз” АЖнинг бугунги кунда бозорда хусусий тадбиркорлар фаолият кўрсатаётган ва фаолиятига хос бўлмаган 23 та активлари дастурга киритилган. Улардан 4 таси жамият тизим корхонасининг болалар боғчаси ҳисобланади.
Таъкидланишича, хусусийлаштириш дастури қарорида ижтимоий соҳа объектларини сотиш муддати ва шартлари, шу жумладан, фаолият турини сақлаш шартлари Давлат мулкини хусусийлаштириш ва хусусийлаштириш жараёнларини мувофиқлаштириш бўйича комиссияси томонидан белгиланиши кўрсатилган.
Ушбуларга кўра, мазкур болалар боғчаларининг узлуксиз ва самарали фаолиятини таъминлаш бўйича аниқ чораларни белгилаш ишлари якунланмагунга қадар, улар оммавий савдоларга чиқарилмайди ва “Шўртан газ кимё мажмуаси” МЧЖнинг 4 та болалар боғчаси сотилмайди, ҳозирча корхона ихтиёрида қолдирилади.
Қўшимча равишда таъкидлаш зарурки хусусийлаштириш дастурида аввал (собиқ) ижтимоий соҳа объекти бўлган бўш турган объектлар тегишли соҳа вазирлиги билан келишилган ҳолда дастурга киритилган, алоҳида эътиборли томони шундаки, бундай собиқ ижтимоий соҳа объектлари таълим, мактабгача таълим, соғлиқни сақлаш соҳасида хусусий муассасаларини ташкил этиш шарти билан хусусийлаштирилиши белгилаб қўйилган, — дейилади муносабатда.
Аввалроқ “Ўзбекистон шампани”нинг давлат улуши 72 млрд сўмга сотилгани, “Пахтакор” футбол клубини хусусийлаштириш вақтинча тўхтатилгани, собиқ ташқи ишлар вазири Абдулазиз Комиловнинг ўғли “Ўзбекнефтгаз” заправкалари эгасига айлангани тўғрисида хабар берилганди.
Изоҳ (0)